راولپنڈی (این این آئی)بانی پی ٹی آئی نے احتجاج کے حوالے سے اسلام آباد ہائیکورٹ کا فیصلہ چیلنج کرنے کی ہدایت کردی۔اڈیالہ جیل کے باہر میڈیا سے گفتگو کرتے ہوئے بانی پی ٹی آئی وکیل فیصل چوہدری ایڈووکیٹ نے کہا کہ بانی پی ٹی نے واضح کیا ہے کہ 24نومبر کا احتجاج پر امن ہوگا اور طاقت ملی تو کسی سے بدلہ نہیں لیں گے کیونکہ یہ سنت ہے۔فیصل چوہدری نے کہا کہ بانی پی ٹی آئی 24نومبر کی احتجاج کی کال پر ڈٹے ہوئے ہیں۔ انہوں نے کہا کہ بشری بی بی نے اپنے بیان میں سعودی عرب کا ذکر نہیں کیا، سعودیہ کے ساتھ اچھے تعلق ہیں، بانی پی ٹی آئی نے بتایا کہ وزیر آباد حملے کے بعد محمد بن سلمان نے انہیں کال بھی کی تھی۔انہوں نے کہا کہ پارا چنار واقعہ پر بانی پی ٹی آئی نے سخت افسوس کا اظہار کرتے ہوئے کہا ہے کہ اس کا حل سیاسی سپورٹ کے بغیر ممکن نہیں۔
