اسلام آباد (این این آئی)انسداد دہشت گردی عدالت نے 9مئی کے پہلے مقدمے میں پی ٹی آئی کے 10کارکنوں کو 4،4سال قید کی سزا سناتے ہوئے جیل بھیج دیا۔انسداد دہشت گردی عدالت اسلام آباد کے جج طاہر عباس سپرا نے 9مئی بارے درج پہلے مقدمہ میں پی ٹی آئی کارکنان کی سزا کا 15صفحات پر مشتمل تفصیلی فیصلہ جاری کردیا۔پی ٹی آئی کے 10ملزمان کو مختلف دفعات میں مجموعی طور پر 4،4 سال قید کی سزا سنادی گئی، ضمانت پر رہا ہونے ملزمان کو دفعہ 341میں ایک ،ایک ماہ قید اور ایک ،ایک ہزار روپے جرمانہ عائد کیا گیا۔دفعہ 186میں ملزمان کو تین ،تین ماہ قید اور ایک ،ایک ہزار روپے جرمانے کی سزا دی گئی ہے، دفعہ 353میں ملزمان کو دو، دو سال قید اور 20،20ہزار روپے جرمانے کی سزا دی گئی۔ دفعہ 188میں ملزمان کو چھ ،چھ ماہ قید اور 3،3ہزار روپے جرمانے کی سزا دی گئی اور دفعہ 149 میں ملزمان کو تین تین سال قید اور 20،20ہزار روپے جرمانے کی سزا سنائی گئی۔تحریری فیصلے کے مطابق اشتہاری قرار دیئے گئے چھ ملزمان کے ناقابل ضمانت وارنٹ گرفتاری جاری کئے گئے، ملزمان کیخلاف دفعہ 382اور 436ثابت نہیں کی جاسکی۔ عدالتی فیصلے میں کہا گیا ہے کہ ملزمان کا تعلق ایک سیاسی پارٹی سے بتایا گیا لیکن شکایات میں ایسی کوئی بات نہیں لکھی گئی، ملزمان کو دہشت گردی سمیت دفعہ 382اور 436میں بری کیا جاتا ہے۔
