ابوظہبی(این این آئی)ابوظہبی نیشنل انرجی کمپنی طاقہ نے دو سری انٹرنیشنل پاور کمپنیوں کے ہمراہ سعودی پاور پروکیورمنٹ کمپنی (ایس پی پی سی)کیساتھ 25سالہ بجلی خریداری کے دو معاہدوں پر دستخط کر دیئے۔غیر ملکی میڈیا کے مطابق ابوظہبی نیشنل انرجی کمپنی طاقہ،جاپانی کمپنی جیراکارپوریشن اور البوانی ہولڈنگ کی ذیلی کمپنی البوانی کیپٹل نے سعودی پاور پروکیورمنٹ کمپنی (ایس پی پی سی)کیساتھ 25سالہ بجلی خریداری کے دو معاہدوں پر دستخط کر دیئے تاکہ سعودی عرب میں دو نئے گرین فیلڈ کمبائنڈ سائیکل گیس ٹربائن پاور پراجیکٹس تیار کئے جا سکیں۔وام کے مطابق معاہدوں کے تحت 3.6گیگا واٹ سے زیادہ کی کل بجلی پیدا کرنے کی صلاحیت والے یہ منصوبے ہائی ایفیشنسی ٹربائنز اور کاربن کیپچر ٹیکنالوجیز استعمال کریں گے۔یہ پلانٹس سعودی عرب کے توانائی کے امتزاج کے عزائم اور سعودی گرین انیشی ایٹو کے مطابق ہیں، جس کا مقصد 2030ء تک 50فیصد قابل تجدید توانائی اور 50فیصد گیس ٹیکنالوجی اور 2060ء تک نیٹ زیرو گرین ہاس گیس کے اخراج کا حصول ہے۔ان پلانٹس کی تعمیر میں سب سے زیادہ حصہ داری 49فیصد طاقہ کی ہے ، جیرا 31فیصد اور البوانی 20فیصد کی ملکیت رکھے گے ۔پلانٹس تینوں اداروں کے باہمی اشتراک سے تیار کئے جائیں گے۔
