اسلام آباد(این این آئی)سابق نگراں وفاقی وزیر تجارت گوہر اعجاز نے عوام پر اضافی ٹیکسوں کا بوجھ ڈالنے کے پلان کی مخالفت کردی۔ایک بیان میں سابق نگراں وفاقی وزیر تجارت نے کہا کہ حکومت 180ارب روپے کا ٹیکس شارٹ فال پورا کرنے کیلئے عوام پر مزید ٹیکسوں کا بوجھ نہ ڈالے، عوام پہلے ہی بنیادی ضروریات پوری کرنے کیلیے مہنگائی کا سامنا کر رہے ہیں۔ گوہر اعجاز نے کہا کہ گذشتہ ڈھائی برس میں مہنگائی میں 60فیصد اضافہ ہوا ہے۔سابق نگراں وزیر تجارت نے کہا کہ ایف بی آر کا ٹیکس شارٹ فال ٹیکس نظام میں اصلاحات کے ذریعے پورا کیا جائے، حکومت غیر معمولی منافع کمانے والی مقدس گائے پر ٹیکس لگائے۔ گوہر اعجاز نے کہاکہ ٹیکس نظام کی کمزوریوں کے باعث بعض شعبوں میں مقدس گائے غیر معمولی منافع کما رہی ہیں۔ انہوںنے کہاکہ گھریلو، کمرشل، صنعتی صارفین کو بجلی کے بلز میں12روپے کا ریلیف دیا جائے، صارفین کو صرف موسم سرما میں اضافی بجلی کے استعمال پر ریلیف نہ دیا جائے۔ انہوںنے کہاکہ31دسمبر تک آئی پی پیز کے ساتھ معاہدوں کو حتمی شکل دے کر یہ ریلیف عوام کو دیا جاسکتا ہے۔
