لاہور ( این این آئی) گورنر پنجاب سردار سلیم حیدر خان سے گورنر ہائوس لاہور میں چیف انسٹرکٹر نیپا اسلام آ باد ڈاکٹر ثمرین زہرا کی قیادت میں 16 مختلف محکموں کے36ویں سینئر مینجمنٹ کورس کے افسران نے ملاقات کی۔اس موقع پر گفتگو کرتے ہوئے گورنر پنجاب سردار سلیم حیدر خان نے کہا کہ سول سروس کا مقصد عوام کی خدمت ہے اور بطور سول سرونٹس پبلک سروس آپ کی ترجیح ہونی چاہئے ۔ انہوں نے کہا کہ ملک و قوم کی ترقی میرٹ کی بالادستی اور اداروں کی مضبوطی میں ہے ۔گورنر پنجاب نے کہا کہ عوام کے مسائل کو حل کرکے اور ان کی تکالیف کا ازالہ کر کے ہم اداروں میں کاکردگی کے حوالے سے بہتر نتائج حاصل کرسکتے ہیں۔ انہوں نے اس امید کا اظہار کیا کہ آپ افسران لوگوں کو ریلیف دینے اور ان کی فلاح و بہبود کے لئے اپنی تمام تر صلاحیتیں بروئے کار لائیں۔گورنرپنجاب نے مزید کہا کہ حکومت کو تعلیم اور صحت کے شعبوں میں عوام کو زیادہ سے زیادہ ریلیف دینے کی ضرورت ہے۔انہوں نے کہا کہ یونیورسٹیوں میں بہتری لانے کے لیے ایک باقاعدہ پلان مرتب کیا جارہا ہے۔ اس موقع پرگورنر پنجاب نے افسران کے سوالات کے جواب بھی دیئے ۔قبل ازیں ، چیف انسٹرکٹر نیپا اسلام آباد ڈاکٹر ثمرین زہرا نے گورنر پنجاب کو36ویں سینئر مینجمنٹ کورس کے اغراض و مقاصد کے بارے میں تفصیلی آگاہ کیا۔بعد ازاں گورنر پنجاب سردار سلیم حیدر خان سے گورنر ہائوس لاہور میں تاجر رہنما عظمت شاہ کی قیادت لاہور کی تاجر برادری کے وفدنے ملاقات کی۔ ملاقات کے دوران وفد نے گورنر پنجاب کو تاجر برادری کو درپیش مسائل بارے گاہ کیا۔اس موقع پر گفتگو کرتے ہوئے گورنر پنجاب سردار سلیم حیدر خان نے کہا کہ تاجر برادری ملکی معیشت میں ریڑھ کی ہڈی کی حیثیث رکھتی ہے۔انہوں نے کہا کہ یہ بات قابل تحسین ہے کہ کاروباری افراد ملکی معیشت میں بہتری لانے کے ساتھ ساتھ فلاحی کاموں میں بھی بڑھ چڑھ کر حصہ لیتے ہیں۔ گورنر پنجاب نے کہا کہ معیشت کی ترقی کے لیے کاروباری حضرات کو سازگار ماحول فراہم کرنا بہت ضروری ہے۔انہوں نے کہا کہ کسی بھی ملک کی معاشی ترقی کے لیے پالیسیوں کا تسلسل بہت اہم ہے۔ گورنر پنجاب نے کہا کہ ملک کی معیشت سمیت دیگر شعبوں میں بہتری آرہی ہے۔ انہوں نے تاجر برادری کو دریش مسائل مختلف محکموں تک پہنچانے کی یقین دہانی کروائی۔
