اسلام آباد (این این آئی)وزیر اعظم شہباز شریف نے کراچی میں چینی شہریوں پر فائرنگ واقعے کی مذمت کرتے ہوئے چینی سفیر کو یقین دہانی کرائی ہے کہ ذمہ داران کو جلد گرفت میں لے کر قرار واقعی سزا دی جائے گی۔جاری بیان کے مطابق وزیر اعظم شہباز شریف نے اسلام آباد میں چینی سفارتخانے میں پاکستان میں چینی سفیر جیانگ زائیڈونگ سے ملاقات کی اور گزشتہ روز کراچی میں چینی شہریوں پر فائرنگ واقعے کی مذمت کی۔ وزیراعظم نے کہاچینی سفیر کو ذمہ داران کو جلد گرفت میں لے کر انہیں قرار واقعی سزا دلوانے کی یقین دہانی کراتے ہوئے کہا کہ چینی شہریوں پر حملے کی مذمت کرنے اور زخمیوں کی بیمار پرسی کیلئے آپ سے ملنے آیا ہوں۔ انہوں نے کہا کہ واقعے میں ملوث افراد کو گرفت میں لینے اور انہیں قرار واقعی سزا دلوانے کے عمل کی بذات خود نگرانی کر رہا ہوں۔ انہوں نے کہا کہ واقعے میں زخمی چینی شہریوں کو بہترین طبی سہولیات فراہم کرنے کی ہدایات دے چکے ہیں، قابل اطمینان بات ہے کہ واقعے میں زخمی چینی شہریوں کی صحت بہتر ہو رہی ہے۔ انہوں نے کہاکہ چین پاکستان کا دیرینہ دوست ،شہریوں پر حملہ پاک چین برادرانہ تعلقات کو نقصان پہنچانے کی مذموم کوشش ہے۔ انہوں نے کہا کہ پاکستان میں کام کرنے والے چینی شہریوں کی سیکیورٹی حکومت کی اولین ترجیح ہے۔چینی سفیر نے وزیراعظم کی سفارتخانے آمد پر شکریہ ادا کرتے ہوئے امید ظاہر کی کہ وزیراعظم واقعے کے ذمہ داران کو جلد کیفر کردار تک پہنچانے میں کردار ادا کریں گے۔
