اسلام آباد(این این آئی)ایف بی آرکی نان فائلرز پر پابندیوں کی دھمکی کام کرگئی، رواں مالی سال انکم ٹیکس گوشواروں کی تعداد 51لاکھ 52ہزار سے تجاوز کر گئی۔ بجلی گیس کے کنکشن اور موبائل سم بچانے جبکہ بیرون ملک سفر سمیت دیگر پابندیوں سے بچنے کیلئے شہریوں نے سمجھداری اور ذمہ داری کا مظاہرہ کیا اور 22لاکھ 62ہزار سے زائد افراد فائلر بن گئے جبکہ انکم ٹیکس گوشواروں کی تعداد 78فیصد اضافے کیساتھ 51لاکھ 52ہزار تک پہنچ گئی۔ایف بی آر کے اعداد و شمار کے مطابق گزشتہ سال31اکتوبر تک 28لاکھ 90ہزار 944گوشوارے داخل کیے گئے تھے۔رواں سال، گوشواروں کیساتھ جمع شدہ ٹیکس میں بھی 74فیصد یعنی 55ارب روپے کا اضافہ ہوا جس سے کل جمع شدہ ٹیکس 130ارب 60کروڑ روپے تک پہنچ گیا۔گزشتہ سال اسی مدت میں 75ارب 14کروڑ روپے کا ٹیکس جمع ہوا تھا۔ایف بی آر کے مطابق سال2024میں 20لاکھ 7ہزار 508افراد نے قابل ٹیکس آمدنی صفر ظاہر کی ہے جو مجموعی گوشواروں کا 39فیصد بنتا ہے۔جولائی 2023سے اب تک 13لاکھ 8ہزار 182افراد نئے فائلرز بنے ہیں جبکہ جولائی 2024سے 6لاکھ 31ہزار 713افراد نے نئی رجسٹریشن کرائی ہے۔
