لاہور ( این این آئی)پنجاب میں گزشتہ 24گھنٹوں کے دوران ڈینگی کے مزید 150کیسز رپورٹ ہوئے ہیں ، ایک ہفتہ میں ڈینگی کے 933جبکہ رواں سال ابتک 5594ڈینگی کے کیسز رپورٹ ہو چکے ہیں۔محکمہ پرائمری اینڈ سیکنڈری ہیلتھ کیئر نے صوبہ بھر میں ڈینگی کے اعدادو شمار جاری کردیئے۔ ترجمان محکمہ صحت کے مطابق گزشتہ 24گھنٹوں میں راولپنڈی سے ڈینگی کے131، لاہور سے6،اٹک اور چکوال سے 3،3کیس ، حافظ آباد سے 2 جبکہ فیصل آباد، میانوالی، سیالکوٹ، ساہیوال اور بہاولنگر سے 1،1 کیس رپورٹ ہوا۔ ترجمان محکمہ صحت کے ترجمان نے بتایا کہ انسداد ڈینگی کیلئے تمام انتظامات مکمل کر رکھے ہیں،تمام سرکاری ہسپتالوں میں ڈینگی سمیت دیگر ادویات کا سٹاک موجود ہے۔