اسلام آباد(این این آئی)چیئرمین وزیراعظم یوتھ پروگرام رانا مشہود احمد خان نے کہا ہے کہ موجودہ حکومت نے مشکل معاشی حالات میں آئی ایم ایف جیسے پیچیدہ چیلنجز کو بھی کامیابی سے حل کیا۔ پیر کو اپنے بیان میں انہوں نے کہا کہ جب شہباز شریف صاحب نے وزارت عظمیٰ کا منصب سنبھالا تو انہوں نے مزار قائد پر حاضری دیتے ہوئے عزم کیا تھا کہ وہ پاکستان کو ترقی کی راہ پر گامزن کریں گے اور عالمی سطح پر ملک کا وقار بحال کریں گے۔ انہوں نے کہا کہ اپنے تجربے، مدبرانہ سوچ اور انتھک محنت سے وزیراعظم نے نہ صرف اقوام متحدہ جیسے بین الاقوامی فورمز پر پاکستان اور امت مسلمہ کی باوقار نمائندگی کی، بلکہ مشکل معاشی حالات میں آئی ایم ایف جیسے پیچیدہ چیلنجز کو بھی کامیابی سے حل کیا، آج معیشت کی بہتری اور سفارتی میدان میں کامیابیاں جیسے پاکستان میں ایس سی او کانفرنس کا انعقاد اور سعودیہ، چین اور روس کے ساتھ اہم معاہدے شہباز شریف کی مدبرانہ قیادت کا ثبوت ہیں۔رانا مشہود احمد خان نے کہا کہ اب وقت آ گیا ہے کہ نوجوانوں کے ساتھ کیے گئے وعدوں کی تجدید عہد کی جائے اور نوجوان ترقی کے سفر کا حصہ بن کر پاکستان کی خوشحالی ، خودمختاری اور سالمیت میں اپنا حصہ ڈال سکیں ۔