کراچی(این این آئی)پاکستان پیٹرولیم ڈیلرز ایسوسی ایشن نے ملک بھر میں پیٹرول پمپس پر جاری ہڑتال فوری موخر کرنے کا اعلان کرتے ہوئے کہا ہے کہ شمالی علاقہ جات پر پھنسے سیاحوں کے باعث فیصلہ واپس لیا، ہڑتال ملتوی کی ہے ختم نہیں، حکومت کے ڈبل ٹیکسیشن کے باعث ملک میں اب سمگل پیٹرول کی فروخت زیادہ ہونے کا امکان ہے، وزیر خزانہ، چیئرمین ایف بی آر و دیگر حکام ملاقاتوں میں خاموش ہی رہے۔
تفصیلات کے مطابق چیئرمین پاکستان پیٹرولیم ڈیلرز ایسوسی ایشن عبدالسمیع خان نے دیگر عہدیداروں کے ہمراہ کراچی میں پریس کانفرنس کرتے ہوئے کہا کہ پاکستان پیٹرولیم ڈیلرز ایسوسی ایشن نے ہڑتال فوری طور پر موخر کرنے کا اعلان کردیا ہے۔انہوں نے کہا کہ یہ فیصلہ شمالی علاقہ جات پر سیاحوں کے پھنسنے کے باعث کیا گیا ہے،انہوں نے کہا کہ مالا کنڈ، سوات اور ہزارہ میں سیاح گئے ہوئے ہیں۔ انہوں نے کہا کہ ہماری آج کی ایک روزہ ہڑتال کامیاب رہی ہے، لوگوں کو تکلیف ہورہی ہے کیونکہ موٹر سائیکل والے چل نہیں سکتے۔
انہوں نے کہا کہ اس وقت ہم فوری ہڑتال کی کال واپس لے رہے ہیں، ہڑتال ملتوی کی گئی ہے ختم نہیں ، ہزارہ ڈویژن، پنجاب اور مالاکنڈ میں ڈی سی اور اے سیز نے ڈیلرز کو بلا کر دھمکیاں دی گئیں ،کمزور دل ڈیلرز ان کا حکم مان گئے ہیں ۔ انہوں نے کہا کہ مجھے امید ہے آئندہ ہم جو ایکشن لیں گے اس میں ہمارا ساتھ دیا جائے گا۔انہوں نے کہا کہ حکومت کے ڈبل ٹیکسیشن کے باعث ملک میں اب سمگل پیٹرول کی فروخت زیادہ ہونے کا امکان ہے۔ انہوں نے کہا کہ حکومت نے آنکھیں بند کرکے ٹیکس لگا یا، ہمیشہ بجٹ بنانے سے قبل ہمیں بلایا جاتا تھا ،ہم نے وزیر خزانہ، چیئرمین ایف بی آر و دیگر حکام سے ملاقاتیں کیں تو وہ خاموش ہی رہے، حکومت کے طے کردہ نرخ سے ہم ایک پیسہ نہیں بڑھا سکتے ہیں۔
