لاہور ( این این آئی)مرکزی صدر تحریک انصاف چودھری پرویزالٰہی کی اہلیہ بیگم قیصرہ الٰہی نے خاندانی صلح کی خبروں کی تردید کرتے ہوئے کہا ہے کہ چودھری شجاعت حسین کا چودھری پرویزالٰہی کی رہائی میں کوئی کردار نہیں، ہماری کسی قسم کی کوئی خاندانی صلح نہیں ہوئی، یہ سب باتیں جھوٹ پر مبنی ہیں، چودھری پرویزالٰہی کی رہائی اللہ کے کرم سے ہوئی،
عدالتوں نے ہمیں انصاف فراہم کیا۔ قیصرہ الٰہی نے کہا کہ چودھری پرویزالٰہی نے شجاعت صاحب کو ایک پیغام دیا ہے جب تک ہمارا چوری شدہ مینڈیٹ واپس نہیں ہو گا کوئی بات نہیں ہو گی، چودھری پرویزالٰہی نے اپنے حالیہ بیان میں بھی اس بات کو واضح انداز میں کہا ہے۔ انہوں نے کہاکہ مونس الٰہی ہی نہیں بلکہ چودھری پرویزالٰہی بھی پی ٹی آئی کے ساتھ رہیں گے، چودھری پرویزالٰہی ق لیگ میں جانے کو نہ اب تیار ہیں اور نہ آئندہ ایسا ہو گا،
یہ سب بے بنیاد باتیں ہیں، ق لیگ اب ایک ایسی جماعت بن چکی ہے جو چوری کے مینڈیٹ پر قائم ہے، کوئی بھی عقل اور شعور رکھنے والا شخص ق لیگ کا ممبر نہیں بن سکتا۔ قیصرہ الٰہی نے مزید کہا کہ چودھری شجاعت کے دونوں بیٹے سارا وقت ہمارے خلاف جھوٹ پھیلانے میں مصروف رہتے ہیں، پچھلے سال سوا سال سے یہ دونوں مختلف ذرائع سے اس طرح کی افواہیں پھیلا رہے ہیں، نہ جانے یہ ایسی جھوٹی خبریں پھیلا کر کیا مقاصد حاصل کرنا چاہتے ہیں۔
