اسلام آباد (این این آئی)نائب وزیراعظم اور وزیر خارجہ محمد اسحاق ڈار نے کہا ہے کہ امریکی ایوان نمائندگان میں منظور ہونے والی قرارداد پر دفتر خارجہ نے ردعمل دے دیا ہے، قومی اسمبلی میں بھی بجٹ کی منظوری کے بعد اس حوالے سے قرارداد لائیں گے، پاک ایران گیس منصوبے سمیت خارجہ پالیسی کے حوالے سے ایوان کو بریفنگ دینے کیلئے تیار ہیں، حکومت نے مسئلہ فلسطین، کشمیر، اسلامو فوبیا اور سوشل میڈیا پر نبی پاک صلی اللہ علیہ وآلہ وسلم کی شان اقدس کے بارے میں گستاخانہ مواد کے حوالے سے او آئی سی سمیت ہر فورم پر آواز بلند کی ہے،

پاکستان موجودہ معاشی صورتحال سے نکلنے کی بھرپور صلاحیت رکھتا ہے، اس میں کچھ وقت لگے گا ہم اس صورتحال سے باہر نکل آئیں گے۔ جمعرات کو قومی اسمبلی میں وزارت خارجہ کے مطالبات زر پر اپوزیشن کی کٹوتی کی تحاریک پر بحث کو سمیٹتے ہوئے انہوں نے کہا کہ کٹوتی کی تحاریک کا مقصد ہی یہی ہوتا ہے کہ موضوع کو زیر بحث لایا جائے۔ انہوں نے کہا کہ ارکان کی طرف سے اس تجویز کا خیر مقدم کرتے ہیں کہ خارجہ پالیسی کے حوالے سے ایک الگ سیشن ہو، ہم خارجہ پالیسی کے حوالے سے مکمل بریفنگ دینے کیلئے تیار ہیں۔

انہوں نے کہا کہ گزشتہ روز دفتر خارجہ نے امریکی ایوان نمائندگان میں منظور ہونے والی قرارداد پر اپنا ردعمل دے دیا ہے۔ بجٹ کی منظوری کے بعد ہم بھی اس قرارداد کے حوالے سے ایک قرارداد لائیں گے۔ انہوں نے کہا کہ بیرون ملک مقیم پاکستانیوں کو ووٹ کا حق دینے کے حوالے سے آئین میں ترمیم کریں ہم اس کی سپورٹ کریں گے۔ ہم بیرون ملک مقیم پاکستانیوں کو ووٹ کا حق دینا چاہتے ہیں۔ مسلم لیگ (ن) نے پہلے بھی بیرون ملک مقیم پاکستانیوں کو ووٹ کا حق دینے کے حوالے سے ایک فارمولا دیا تھا جس پر اوورسیز پاکستانیوں نے بھرپور اعتماد کا اظہار کیا تھا۔

انہوں نے کہا کہ یہ کہنا درست نہیں کہ حکومت نے فلسطین کے حوالے سے کچھ نہیں کیا، وزیراعظم شہباز شریف کی حکومت نے مسئلہ فلسطین کے حوالے سے اپنا موثر کردار ادا کیا ہے، ہمارا موقف اور عزم اس حوالے سے واضح ہے کہ فلسطین میں جو کچھ ہو رہا ہے ہم اس کی بھرپور مخالفت کرتے ہیں اس حوالے سے ہم نے گیمبیا میں ہونے والے اجلاس میں بڑے دلیرانہ انداز میں اسرائیلی جارحیت کی مذمت کی اور مطالبہ کیا کہ یہ جنگ بند ہونی چاہئے۔ فلسطینیوں کیلئے خوراک کی ترسیل میں رکاوٹیں ختم ہونی چاہئیں، القدس الشریف فلسطین کا دارالحکومت ہونا چاہئے۔

انہوں نے کہا کہ استنبول میں ہونے والے اجلاس میں بھی پاکستان نے اپنا بھرپور کردار ادا کیا۔ عمان میں 65 ممالک کا سربراہ اجلاس منعقد ہوا جس میں وزیراعظم کی ہدایت پر میں نے پاکستان کی نمائندگی کی۔ پاکستان سے 2400 میٹرک ٹن خوراک اور امدادی سامان ہم نے اردن کے ذریعے بھجوانے کا فیصلہ کیا۔ انہوں نے کہا کہ کشمیر کے حوالے سے بھی ہم نے او آئی سی کے اجلاس میں اپنی بھرپور آواز بلند کی جس میں ہمارے دوست ممالک نے ہمارا بھرپور ساتھ دیا۔ انہوں نے کہا کہ او آئی سی کے اجلاس میں ہم نے نبی پاک صلی اللہ علیہ وآلہ وسلم کی شان میں گستاخانہ خاکوں کے حوالے سے بھی بھرپور آواز بلند کی ہے اور مطالبہ کیا ہے کہ سوشل میڈیا پر ایسا گستاخانہ میٹریل ہٹا دینا چاہئے۔

غزہ، اسلامو فوبیا اور کشمیر کے حوالے سے ہم نے اپنا بھرپور کردار ادا کیا ہے۔ انہوں نے کہا کہ یہ کہنا درست نہیں کہ پاکستان تنہائی کا شکار ہو رہا ہے، ہماری خارجہ پالیسی درست سمت میں ہے، پاکستان دو سالوں کیلئے اقوام متحدہ کی سلامتی کونسل کا رکن منتخب ہوا ہے، چین ہمارا بہترین ہمسایہ ملک اور دوست ہے۔ پچھلے چند سالوں میں سی پیک منصوبہ جو کٹھائی میں پڑھ گیا تھا وزیراعظم شہباز شریف نے نہ صرف اس منصوبے کو بحال کرانے کیلئے اپنا بھرپور کردار ادا کیا ہے بلکہ یہ اپ گریڈ کیا جا رہا ہے چین کی حکومت نے حالیہ دنوں میں اپنا ایک انتہائی اعلی سطحی وفد بھی پاکستان بھیجا۔ انہوں نے کہا کہ یہ ساری وہ چیزیں ہیں جن کے ذریعے ہم نے پاکستان کو آگے لیکر جانا ہے۔

انہوں نے کہا کہ یہ کہنا بھی درست نہیں کہ بشام میں ہلاک ہونے والے چینی ورکروں کے لواحقین کو 27 ملین ڈالر ادا کئے ہیں بلکہ پاکستان کی جانب سے صرف اڑھائی ملین ڈالر کی رقم ادا کی گئی ہے۔ ہم چاہتے ہیں کہ افغانستان مضبوط ہو، ہم افغان حکومت کے ساتھ رابطے میں ہیں۔ اس سلسلے میں آئندہ چند ہفتوں میں دوحہ میں ایک سہ فریقی سمٹ ہو رہی ہے جس میں پاکستان، افغانستان اور دوحہ شرکت کریں گے۔ پاک ایران گیس پائپ لائن کے حوالے سے اٹھائے گئے اعتراضات کا جواب دیتے ہوئے انہوں نے کہا کہ اس سلسلے میں امریکی پابندیاں ایک بڑی رکاوٹ ہیں، وزارت پٹرولیم اس معاملے پر بھی ایوان کو بریفنگ دینے کیلئے تیار ہے۔

اسحاق ڈار نے کہا کہ کرغزستان میں پاکستانی طلبا کی ہلاکت کی جعلی پوسٹیں سوشل میڈیا پر لگائی گئیں، ایسی پوسٹیں بند ہونی چاہئیں اور کوئی بھی ایسی بات حقائق کے برعکس نہیں ہونی چاہئے۔ انہوں نے کہا کہ میں نے جب سے وزارت خارجہ کا قلمدان سنبھالا ہے میرا موقف ہے کہ روایتی ڈپلومیسی کی بجائے اکنامک ڈپلومیسی کو آگے بڑھائیں گے۔ انہوں نے کہا کہ پاکستان میں 10 ٹریلین ڈالر کے وسائل موجود ہیں ۔ انہوں نے کہا کہ ماضی میں بھی پاکستان کے دیوالیہ ہونے کی باتیں کی جاتی تھیں مگر ہم نے اپنی حکومت میں ملک کو اس صورتحال سے نکالنے کیلئے 10، 12 سال کی بجائے صرف ساڑھے تین سالوں میں ملک کی معیشت کو مستحکم کیا۔ پاکستان اب بھی اس صورتحال سے باہر نکلنے کی بھرپور صلاحیت رکھتا ہے، ہمارا وژن اور سمت واضح ہے۔ اب بھی کچھ وقت لگے گا ہم اس صورتحال سے باہر نکل آئیں گے۔