اسلام آباد(این این آئی)پاکستان نے اقوامِ متحدہ کے تحت افغانستان پر ہونے والے دوحہ مذاکرات میں شرکت کرنے کا فیصلہ کر لیا ہے۔سفارتی ذرائع کے مطابق پاکستان رواں ہفتے قطر میں افغانستان پر ہونے والے مذاکرات میں شرکت کرے گا۔نمائندہ خصوصی برائے افغانستان آصف درانی اور احمد نسیم وڑائچ ان مذاکرات میں پاکستان کی نمائندگی کریں گے۔

احمد نسیم وڑائچ وزارتِ خارجہ میں اسسٹنٹ سیکریٹری برائے مغربی ایشیا ہیں۔آصف درانی اور احمد نسیم وڑائچ کی قیادت میں پاکستانی وفد آئندہ چند روز میں دوحہ جائے گا۔اقوامِ متحدہ کی میزبانی میں تیسرے 2 روزہ دوحہ مذاکرات 30 جون سے ہوں گے۔رواں برس تیسرے دوحہ مذاکرات میں افغان عبوری حکومت باقاعدہ شرکت کرے گی۔

افغان طالبان عبوری حکومت نے دوسرے دوحہ مذاکرات میں افغان خواتین و سول سوسائٹی کے نمائندوں کی شرکت پر بائیکاٹ کیا تھا۔پہلی مرتبہ دنیا بھر کے افغانستان پر خصوصی نمائندے دوحہ مذاکرات میں افغان طالبان کے سامنے بیٹھیں گے۔اقوامِ متحدہ دوحہ مذاکرات سے قبل افغانستان کے اندر اور باہر کے افغان سول سوسائٹی کے نمائندوں سے مشاورت کر رہا ہے۔تیسرے دوحہ مذاکرات میں افغان طالبان کی افغانستان کی عبوری حکومت کو تسلیم کرنے پر پیش رفت خارج از امکان ہے۔