مکوآنہ (این این آئی)پاکستان کے تیسرے بڑے صنعتی شہر فیصل آباد میں بجلی مہنگی ہونے پر کارخانے‘ ملیں اور فیکٹریاں بند ہونے اور شہریوں کی طرف سے سولر سسٹم نصب کروانے پر فیسکو کے پاس 6 سومیگا واٹ بجلی سرپلس ہو گئی۔ تفصیلات کے مطابق سرپلس ہونے والی بجلی کا بوجھ بھی صارفین پر ڈالنے کی تیاریاں شروع کر دی۔
ذرائع کا کہنا ہے کہ موجودہ مہنگائی کے دور میں بجلی‘ گیس کی قیمتوں میں ہوشربا اضافہ کی وجہ سے مانچسٹر آف پاکستان فیصل آباد میں سینکڑوں ملیں‘ فیکٹریاں‘ کارخانہ‘ باردانہ سیکٹر بند ہو چکا ہے۔ یا پھر ملوں‘ فیکٹری مالکان نے مہنگی بجلی ہونے سے پروڈکشن کم کرتے ہوئے فیکٹری 8سے دس گھنٹے تک چلا رہے ہیں، جسکی وجہ سے بجلی کی کھپت بھی کم ہو گئی ہے اور بجلی کی قیمتوں میں اضافہ کی وجہ سے شہریوں کی بڑی تعداد سولر سسٹم پر منتقل ہو چکے ہیں اور سولر سسٹم سستا ہونے کی وجہ سے شہریوں کی اکثریت سولر سسٹم سے استفادہ حاصل کر رہی ہے۔
جسکی وجہ سے بھی بجلی کی کھپت میں کافی حد تک کمی آئی ہے اور سولر سسٹم پر گرین میٹر لگنے سے صارفین کی بڑی تعداد بجلی کے زیادہ یونٹس فیسکو کو فروخت کرتے ہیں۔ جسکی وجہ سے بجلی کے استعمال میں مسلسل کمی واضح ہو رہی ہے۔ فیسکو ذرائع کے مطابق بجلی کی قیمتیں بڑھنے کی وجہ سے ملیں‘ فیکٹریاں‘ کارخانہ بند ہونے اور شہریوں کی طرف سے سولر سسٹم کے رجحان کی وجہ سے بجلی کے استعمال میں کمی آنے سے فیسکو کے پاس 6سو کلو واٹ سے زائد بجلی سرپلس ہو گئی ہے اور مبینہ طور پر مذکورہ زائد بجلی کے استعمال نہ ہونے سے اس کا بوجھ پر صارفین پر ڈالنے کی تیاریاں شروع کرد ی ہیں۔
