اسلام آباد(این این آئی)وفاقی دارالحکومت اسلام آباد میں گزشتہ روز گم ہو جانے والے 15سالہ طالب علم طحہٰ کی لاش مارگلہ کے ہائیکنگ ٹریل 5سے مل گئی۔گزشتہ روز طالب علم کی والدہ نے تھانہ سیکریٹریٹ میں بیٹے کی گمشدگی کا مقدمہ درج کرایا تھا۔ہفتے کی صبح طحہٰ ٹریل 5 پر دوستوں کے ساتھ ہائیکنگ کیلئے گیا اور واپس نہیں آیا تھا۔
پولیس ذرائع کے مطابق اسلام آباد پولیس کھائی میں موجود لاش کے قریب پہنچ گئی،لاش پیر سوہاوہ اور بری امام کے درمیان میں واقع گہری کھائی سے ملی ہے۔پولیس نے بتایا کہ 15سالہ طحہٰ کے ماموں نے بچے کی لاش شناخت کر لی ہے،ایس پی سٹی اور اے ایس پی سیکریٹریٹ واقعے کی جگہ پر موجود ہیں۔پولیس ذرائع کے مطابق بچے کی واٹر بوتل، موبائل فون اور بیگ لاش کے پاس ہی پڑے ہیں،
موبائل فون بند ہونے کے باعث بچے سے رابطہ نہیں ہو پا رہا تھا۔پولیس کے مطابق لاش کو کھائی سے نکال کر لانے میں انتظامیہ کو مشکلات کا سامنا ہے، ریسکیو 1122، ایم سی آئی حکام، وائلڈ لائف، محکمہ جنگلات کی ٹیمیں بھی موجود ہیں، کھائی سے لاش نکالنے کی کوششیں کی جا رہی ہیں۔15سالہ طحہٰ کی ہلاکت کی وجہ فی الحال سامنے نہیں آ سکی ہے۔
