لاہور (این این آئی)صوبائی ڈیزاسٹر مینجمنٹ اتھارٹی (پی ڈی ایم اے) نے پنجاب میں طوفانی بارشوں کا الرٹ جاری کر دیا ۔ ترجمان پی ڈی ایم اے نے بتایا کہ 24 اپریل کی رات کو پنجاب میں مغربی ہوائیں داخل ہوں گی جبکہ 26 سے 28 اپریل جنوبی پنجاب کے اضلاع میں طوفانی بارشیں ہو سکتی ہیں۔ترجمان نے بتایا کہ 29 اپریل تک پنجاب میں گرج چمک کے ساتھ طوفانی بارش اور ژالہ باری کا امکان ہے۔

ترجمان کے مطا بق مری، گلیات، راولپنڈی، اٹک، جہلم، چکوال، گجرات، سیالکوٹ، نارووال، لاہور، قصور، اوکاڑہ اور فیصل آباد میں بارش کا امکان ہے۔ادْھر محکمہ موسمیات نے چاغی، نوشکی، کیچ، قلات، تربت، پنجگور، گوادر، واشک، خضدار، خاران، کوئٹہ، زیارت اورگردونواح میں تیزہوائوں، آندھی اورگرج چمک کیساتھ بارش کی پیش گوئی کی ہے۔محکمہ موسمیات کے مطابق بلوچستان کے بیشتر اضلاع میں موسم خشک رہیگا۔

انہوں نے کہا کہ کوئٹہ میں کم سے کم درجہ حرارت 12 ڈگری سینٹی گریڈ ریکارڈ کیا گیا ہے، قلات میں کم سے کم درجہ حرارت 9 ڈگری، زیارت میں 6 ڈگری اور چمن میں کم سے کم درجہ حرارت 15 سینٹی گریڈ ریکارڈ کیا گیا ہے۔محکمہ موسمیات کے مطابق ژوب میں کم سے کم درجہ حرارت 13 ڈگری سینٹی گریڈ، سبی میں 23، تربت میں 22، نوکنڈی میں 20، بلوچستان کے ساحلی علاقے جیوانی میں 25 اور گوادر میں کم سے کم درجہ حرارت 24 سینٹی گریڈ ریکارڈ کیا گیا ہے۔