کراچی(این این آئی)پاکستانی شوبز انڈسٹری کی معروف اور باصلاحیت اداکارہ صبا قمر کی اپنے مسٹری مین سے متعلق پوسٹ نے مداحوں کو تشویش میں مبتلا کردیا۔تفصیلات کے مطابق صبا قمر نے اپنے آفیشل انسٹاگرام ہینڈل پر اپنی سالگرہ کے جشن کی چند تصاویر پوسٹ کیں، پوسٹ میں اداکارہ کے ساتھی اداکاروں کی جانب سے انہیں تحائف دئیے گئے۔
اداکارہ نے اپنی پوسٹ میں ان تمام مداحوں اور ساتھی اداکاروں کا شکریہ ادا کیا جنہوں نے انہیں سالگرہ کی مبارکباد دی اور ان کے لیے دعائیہ پیغامات بھی جاری کیے۔انہوں نے کہاکہ میرے دل میں ان تمام لوگوں کیلئے خاص جگہ ہے جنہوں نے میری سالگرہ پر مجھے اسپیشل محسوس کروایا۔صبا قمر نے جہاں پاگل خانہ کی کاسٹ کے ہمراہ سالگرہ کا جشن منایا تو وہیں گھر پر بھی ان کے مسٹری مین نے انہیں شاندار سرپرائز دیا جس کی تصاویر انہوں نے اپنی انسٹاگرام اسٹوری میں شیئر کیں۔
انسٹاگرام کی پہلی اسٹوری میں صبا قمر ان کی تصویر کھینچنے والے شخص کی طرف دیکھ رہی ہیں، انہوں نے کسی کو ٹیگ کیے بغیر اپنی اسٹوری میں آئی لو یو لکھا۔صبا قمر نے اپنی اگلی انسٹاگرام اسٹوری میں بھی کسی کو ٹیگ کیے بغیر کہا کہ آپ کی محبت نے مجھے مکمل کردیا ہے، میں اپنی زندگی میں آپ کی موجودگی پر ہمیشہ شکرگزار رہوں گی۔اداکارہ کے اس پیغام نے مداحوں کو یہ سوچنے پر مجبور کردیا ہے کہ آخر صبا قمر کا مسٹری مین کون ہے جوکہ اب تک سامنے نہیں آیا ہے۔
