اسلام آباد (این این آئی)پاکستان سپر لیگ 9 کی فرنچائز پشاور زلمی کے فاسٹ بولر سلمان ارشاد نے کہا ہے کہ خواہش ہے پاکستان کی نمائندگی کروں اور ویرات کوہلی کو آئوٹ کروں۔ایک انٹرویو میں سلمان ارشاد نے کہا کہ پی ایس ایل، سی پی ایل اور ٹی ٹین میں دنیا کے ہر ٹاپ بیٹر کو آئوٹ کیا ہے، نیٹ پر ویرات کوہلی کو بولنگ کراچکا ہوں مگر میچ کی خواہش ہے۔
انہوں نے کہا خواہش ہے کہ پاکستان کی نمائندگی کروں اور ویرات کوہلی کو آئوٹ کروں، پی ایس ایل میں بابر اور رضوان، سی پی ایل میں پولارڈ اور رسل کو آئوٹ کرچکا ہوں، جیسی بیٹنگ کنڈیشنز پی ایس ایل میں ہیں اس میں اپنی کارکردگی سے مطمئن ہوں۔ انہوں نے کہا کہ مختصر بائونڈری میں مس ہٹ بھی بانڈری ہوجاتی ہے، کوشش ہوگی کہ ٹورنامنٹ کے اختتام تک ٹاپ بولر بن جاں، پاکستان کیلئے کھیلنا میرا ہدف ہے، سینے پر جب تک اسٹار نہیں لگ جاتا اس وقت تک خواب پورا نہیں ہوگا۔
سلمان ارشاد نے کہاکہ فاسٹ بولرز میں مقابلہ سخت ہے لیکن میں محنت کررہا ہوں، امید ہے موقع ملے گا، آج کل کی ٹی ٹوئنٹی میں بولرز کے پاس آپشن کم ہے، بولرز کو اب بیٹرز سے ایک قدم آگے سوچنا پڑتا ہے۔کرکٹر نے کہا کہ بابراعظم مجھے بہت اچھی طرح سمجھاتے ہیں، بابر جیسے بیٹر کو بولنگ کرنا چیلنج ہوتا ہے، ان کے ساتھ کھیلنا اعزاز کی بات ہے، پشاور زلمی واحد ٹیم ہے جو ہر سال پلے آف کھیلی ہے، امید ہے اس سال بھی فائنل کھیلیں گے۔
