اسلام آباد (این این آئی)سابق وزیراعظم اور مسلم لیگ (ن)کے قائد نواز شریف نے جمعیت علما اسلام (ف) کے سربراہ مولانا فضل الرحمان کو ساتھ چلنے کی دعوت دیدی۔نواز شریف نے اسلام آباد میں مولانا فضل الرحمان سے ان کی رہائشگاہ پر ملاقات کی۔ اس موقع پر احسن اقبال، اسحاق ڈار، رانا ثنا اللہ، خواجہ سعد رفیق اور مولانا عبدالغفور حیدری بھی موجود تھے۔
ذرائع کے مطابق دونوں جماعتوں کے قائدین کی ملاقات میں ملک کی سیاسی صورتحال سمیت اہم امور پر بات چیت کی گئی۔ذرائع کے مطابق اس دوران مولانا فضل الرحمان نے نواز شریف سے گلے شکوے کیے۔دوسری طرف (ن )لیگی قائد نے جے یو آئی سربراہ سے حکومت سازی میں مدد کی درخواست بھی کی۔بعد ازاں میڈیا سے گفتگو کرتے ہوئے رانا ثنا اللہ نے کہاکہ نواز شریف اور مولانا فضل الرحمان کی ملاقات اچھی رہی،دونوں رہنمائوں میں ون آن ون ملاقات بھی ہوئی ہے،ملاقات میں تمام قومی معاملات زیر غور لائے گئے۔
انہوں نے کہاکہ مولانا فضل الرحمان نے اپنے موقف سے آگاہ کیا،مولانا فضل الرحمان ہمارے رہنما ہیں ،ہم نے سخت وقت گزارا ہے،ہمیں مولانا فضل الرحمان سے ہمیشہ رہنمائی ملتی رہی ہے،ہماری کوشش ہے وہ ہمارے ساتھ رہیں گے۔ انہوںنے کہاکہ ہم چاہتے ہیں مولانا فضل الرحمان کی رہنمائی موثر رہے۔ انہوںنے کہاکہ نواز شریف مولانا فضل الرحمان سے ووٹ مانگنے کی نیت سے نہیں آئے تھے۔ انہوں نے کہاکہ ملک کو درپیش سیاسی صورتحال پر بات ہوئی ہے۔
رانا ثناء اللہ نے کہاکہ ون آن ون ملاقات میں پاکستان کی بہتری کے لئے کسی نتیجہ پر پہنچیں ہوں گے،مولانا فضل الرحمان ہمارے ساتھ بہت شفیق ہیں انہیں ہم کہیں جانے نہیں دیں گے۔ انہوںنے کہاکہ مولانا فضل الرحمان کی ہم سے کوئی ناراضگی نہیں ہے۔ انہوںنے کہاکہ محمود خان اچکزائی ایک معتبر اور محب وطن سیاست دان ہیں،محمود خان اچکزائی کو بھی ساتھ جوڑیں گے۔ انہوںنے کہاکہ جو احترام میاں نواز شریف کی نظر میں اور مولانا کی نظر میں نواز شریف کا ہے وہ مثالی ہے،ہمیشہ ایک دونوں نے ایک دوسرے کی بات مانی ہیں۔
