اسلام آباد (این این آئی) پاکستان مسلم لیگ (ن) کے رہنما سر دار ایاز صادق نے اسپیکر قومی اسمبلی کا حلف اٹھالیا۔ جمعہ کو قومی اسمبلی میں اسپیکر کے انتخاب کی گنتی مکمل ہونے کے بعد سبکدوش ہونے والے اسپیکر راجہ پرویز اشرف نے اعلان کیا کہ سردار ایاز صادق 199 ووٹ لیے جبکہ پاکستان تحریک انصاف کے سنی اتحاد کونسل میں شامل ہونے والے ملک عامر ڈوگر نے 91 ووٹ حاصل کیے۔
قومی اسمبلی کے اسپیکر کے انتخاب کیلئے کل 291 ووٹ ڈالے گئے جبکہ ایک مسترد ہو گیا اور اس طرح پاکستان مسلم لیگ (ن) کے سر دار ایاز صادق اسپیکر قومی اسمبلی منتخب ہوگئے ۔بعد ازاں پاکستان مسلم لیگ (ن)کے ایاز صادق نے اسپیکر قومی اسمبلی کا حلف اٹھالیا۔راجا پرویز اشرف نے نومنتخب اسپیکر قومی اسمبلی ایازصادق سے عہدے کاحلف لیا۔واضح رہے کہ ایاز صادق 2008 میں رکن قومی اسمبلی منتخب ہوئے جبکہ وہ 2013 میں بانی پی ٹی آئی عمران خان کوشکست دے کر رکن قومی اسمبلی بنے تھے۔
حلف اٹھانے کے بعد اجلاس کی صدارت کرتے ہوئے سردار ایاز صادق نے کہا کہ اسپیکرشپ کے لیے اعتماد کرنے پر پارٹی قیادت اور اتحادی رہنماں سے اظہار تشکر کرتا ہوں۔انہوںنے کہاکہ اعتماد پر سابق صدر آصف زرداری، چیئرمین پاکستان پیپلز پارٹی بلاول بھٹو، چوہدری شجاعت حسین، متحدہ قوومی موومنٹ (پاکستان )کے خالدمقبول صدیقی اور دیگر کا بھی شکرگزار ہوں۔ایاز صادق نے کہا کہ تیسری بار اسپیکر کاعہدہ ملنے پرنواز شریف کا شکرگزار ہوں۔پیپلز پارٹی کے غلام مصطفی ڈپٹی اسپیکر قومی اسمبلی منتخب، حلف اٹھالیا،نومنتخب اسپیکر ایاز صادق نے ڈپٹی اسپیکر سے عہدے کا حلف لیا۔
پیپلز پارٹی کے غلام مصطفی 197 ووٹس لے کر ڈپٹی اسپیکر منتخب ہوگئے ہیں،غلام مصطفی کے مدمقابل سنی اتحاد کے امیدوار جنید اکبر 92 ووٹس حاصل کر سکے،نو منتخب ڈپٹی اسپیکر غلام مصطفی نے کہا کہ سنی اتحاد کونسل کے امیدوار جنید اکبر نے انتخابات میں حصہ لے کر الیکشن کی اہمیت اور جمہوریت کی صحت مند روایت کو آگے بڑھایا ہے۔قومی اسمبلی سے خطاب کرتے ہوئے انہوں نے کہاکہ میں سب سے پہلے اللہ کا شکر ادا کرتا ہوں جس نے مجھ جیسے ادنی بندے کو یہ اعزاز نوازا، میں شہیدوں کی جماعت پیپلز پارٹی، آصف علی زرداری، بلاول بھٹو اور تمام پیپلز پارٹی کے ارکان کا بھی احسان مند ہوں.انہوں نے کہا میں مسلم لیگ (ن)کے قائد نواز شریف،شہباز شریف اور مسلم لیگ (ن)کے تمام ساتھیوں، ایم کیو ایم پاکستان مسلم لیگ (ق)کا بھی شکریہ ادا کرتا ہوں۔انہوں نے بتایا میں کسی کے اعتماد کو ٹھیس نہیں پہنچاوں گا۔
