ممبئی(این این آئی)بھارتی لیجنڈری اداکار دھرمیندر اپنی بیٹی ایشا دیول اور بھرت تختانی کی طلاق پر ناخوش ہیں، اداکار چاہتے ہیں کہ ان کی بیٹی اپنے بچوں کی خاطر طلاق کے فیصلے پر دوبارہ نظر ثانی کرے۔بھارتی میڈیا کے مطابق دھرمیندر اور ہیما مالنی کے خاندانی ذرائع نے بتایا کہ دھرمیندر اپنی بیٹی ایشا دیول کے طلاق فیصلے کے خلاف نہیں ہیں لیکن ان کا ماننا ہے کہ علیحدگی سے ایشا اور بھرت کی بیٹیوں پر برا اثر پڑے گا۔

ذرائع کے مطابق دھرمیندر نے کہاکہ کوئی بھی والدین اپنے بچوں کے خاندان کو ٹوٹتا دیکھ کر خوش نہیں ہوتا، وہ بھی بیٹی کے باپ ہیں اسی لیے چاہتے ہیں کہ ان کی بیٹی طلاق کے فیصلے پر ایک بار پھر سے غور کرے۔رپورٹ میں بتایاگیا کہ ایشا دیول اور بھرت تختانی دونوں ہی دھرمیندر کی بے حد عزت کرتے ہیں،بھرت دیول خاندان کیلئے ایک بیٹے کی طرح ہیں جبکہ ایشا دیول اپنے والد دھرمیندر کے بہت قریب ہیں، اسی لیے وہ چاہتے ہیں کہ ان کی بیٹی اپنے گھر میں ہمیشہ خوش رہے۔

خاندانی ذرائع نے کہا کہ دھرمیندر اپنی بیٹی کی طلاق کی وجہ سے بہت اداس ہیں، ان کا ماننا ہے کہ اگر ایشا اور بھرت دونوں چاہیں تو اس شادی کو بچایا جا سکتا ہے۔دوسری جانب ایشا دیول کی والدہ اور سینیئر اداکارہ ہیما مالنی اپنی بیٹی کے فیصلے کی حمایت کررہی ہیں ۔واضح رہے کہ ایشا دیول نے سال 2012میں بھرت تختانی سے شادی کی تھی، اس جوڑی کے ہاں پہلی بیٹی کی پیدائش سال 2017میں ہوئی تھی جبکہ دوسری بیٹی کی پیدائش 2019میں ہوئی تھی۔رواں سال 6فروری کو ایشا دیول اور ان کے شوہر بھرت تختانی نے اپنی طلاق کے حوالے سے مشترکہ بیان جاری کیا تھا جس میں انہوں نے کہا تھا کہ ہم نے باہمی طور پر الگ ہونے کا فیصلہ کیا ہے، ہماری زندگیوں میں اس تبدیلی کے بعد، ہمارے لیے سب سے اہم اور اولین ترجیح ہمارے دونوں بچوں کی تربیت ہوگی۔