تہران(این این آئی)امریکا کی طرف سے اردن میں اپنے فوجیوں پر مہلک حملے کا جواب دینے کی دھمکیوں کے بعد ایران نے ممکنہ طورپر کسی بھی حملے کا سخت جواب دینے کا اعلان کیا ہے۔غیرملکی خبررساں ادارے کے مطابق اقوام متحدہ میں ایرانی ایلچی نے کہاکہ تہران کو گذشتہ دو دنوں کے دوران ثالثوں کے ذریعے امریکا سے کوئی پیغامات موصول نہیں ہوئے ۔
غیرملکی خبر رساں ادارے نے مزید کہا کہ تہران اپنی سرزمین پر کسی بھی حملے کو ریڈ لائن سمجھتا ہے جس کا مناسب اور بھرپور جواب دیا جائے گا۔اقوام متحدہ میں ایران کے مستقل مندوب امیر سعید ایروانی نے اقوام متحدہ کی سلامتی کونسل کے صدر کے نام ایک خط میں کہا کہ ان کا ملک خطے میں کسی فرد یا گروہ کے اقدامات کا ذمہ دار نہیں ہے۔ایروانی نے مزید کہا کہ انہوں نے اپنے فرانسیسی ہم منصب کو بھیجے گئے ایک مکتوب میں واضح کیا کہ عراق اور شام میں امریکی فوجیوں اور تنصیبات پر حملوں میں ایران کے ملوث ہونے کے الزامات غیر ذمہ دارانہ ،غیر منصفانہ اور بے بنیا ہیں۔
