ریاض(این این آئی)ولی عہد اور وزیر اعظم شہزادہ محمد بن سلمان بن عبدالعزیز آل سعود نے بائیو ٹیکنالوجی کے لیے قومی حکمت عملی کا اعلان کر دیا۔ اس حکمت عملی کا مقصد اس شعبے میں ایک سرکردہ ملک کے طور پر مملکت کی پوزیشن کو مضبوط بنانا ہے۔غیرملکی خبررساں ادارے کے مطابق یہ حکمت عملی قومی صحت کو بہتر بنانے اور معیار زندگی کو بلند کرنے پر توجہ مرکوز کرے گی،
اس کے علاوہ ماحولیات کے تحفظ، خوراک اور پانی کے تحفظ، زیادہ سے زیادہ اقتصادی مواقع بنانے اور امید افزا صنعتوں کو مقامی بنانے پر توجہ دی جائے گی، جو مملکت کے وژن 2030 کے اہداف کو حاصل کرنے میں معاون ثابت ہوں گی۔نیشنل بائیوٹیکنالوجی کی حکمت عملی کے آغاز کا مقصد اس تیزی سے بڑھتے ہوئے شعبے میں چیلنجوں سے نمٹنا اور مواقع سے فائدہ اٹھانا ہے۔یہ حکمت عملی مملکت کے لیے سنہ 2040 تک بائیو ٹیکنالوجی کا عالمی مرکز بننے کے لیے ایک جامع روڈ میپ ہے۔قومی حکمت عملی کے تحت وژن 2030 کے مطابق معاشی مواقع میں بہتری اور سعودی نوجوانوں کے لیے نئی اسامیاں پیدا ہوں گی۔
