لاہور ( این این آئی) گندے آئل سے بچوں کے پاپڑ،نمکو سنیکس تیار کرنے والی فیکٹری پکڑی گئی۔ ڈی جی فوڈ اتھارٹی عاصم جاوید نے گجومتہ میں واقع سنیکس فیکٹری کا معائنہ کیا اور ناقص انتظامات پر پروڈکشن بند، 5لاکھ جرمانہ عائد، 5ہزار لیٹر بدبودار ناقص گندا آئل تلف کر دیا گیا ۔ انہوں نے بتایا کہ گندے آئل میں بچوں کے سنیکس تیار کرنے پر کارروائی عمل میں لائی گئی ، ناقص سٹوریج، بلی ،کیڑوں مکوڑوں کی بھرمار پائی گئی ،
آئل خرید اور استعمال کا انتہائی لازم ریکارڈ بھی عدم موجود پایا گیا ،پروڈکشن یونٹ میں فنگس زدہ گندی دیواریں اورصفائی کے انتہائی ناقص انتظامات پر کارروائی عمل میں لائی گئی ۔ ڈی جی فوڈ اتھارٹی نے کہا کہ گندے ناقص آئل کا اشیا خورونوش کی تیاری میں استعمال صحت کے لیے انتہائی مضر ہے، زیادہ منافع کے لالچ میں جعلساز مافیا بیماریاں فروخت کرتا ہے۔پنجاب بھر میں خوراک کا کاروبار کرنے والے فوڈاتھارٹی قوانین پر عملدرآمد یقینی بنائیں۔ خوراک کے معیار پر ہرگز سمجھوتہ نہیں، ملاوٹ مافیاکا جڑ سے خاتمہ اولین ترجیح ہے۔
