تہران (این این آئی)ایران کے نائب صدر برائے پارلیمانی امور سید محمد حسینی نے کہا ہے کہ پاکستان کو خبردار کیا تھا ایسے لوگوں کو ایران آنے سے روکے جو یہاں بڑی تعداد میں لوگوں کو مار دیتے ہیں۔گزشتہ روز ایرانی سکیورٹی فورسز کی جانب سے پاکستان کی فضائی حدود کی خلاف ورزی کرتے ہوئے بلوچستان میں میزائل اور ڈرون حملے کیے گئے تھے۔ایرانی سرکاری ٹی وی کی خبر میں دعویٰ کیا گیا تھا کہ ایرانی سکیورٹی فورسز کی جانب سے پاکستان کے صوبے بلوچستان میں جیش العدل نامی تنظیم کے دو ٹھکانوں پر میزائل اور ڈرون حملے کیے گئے۔
وزارت خارجہ کے مطابق پاکستانی فضائی حدود میں ایرانی حملے کے نتیجے میں دو معصوم بچے جاں بحق اور تین بچیاں زخمی ہوئی تھیں۔پاکستان نے جواب میں ایران سے اپنے سفیر کو واپس بلانے اور ایرانی سفیر کو ملک بدر کرنیکا اعلان کیا ہے اس حوالے سے ایران کے پارلیمانی امور کے نائب صدر محمد حسینی نے کہا کہ پاکستان کو خبردار کیا تھا ایسے لوگوں کو ایران آنے سے روکے جویہاں بڑی تعداد میں لوگوں کو مار دیتے ہیں، ایران کی طرف سے ایسا ردعمل آنا فطری تھا۔ایرانی وزیر دفاع محمدرضااشتیانی نے کہاکہ ایران اپنی سلامتی کیلئے کوئی حدود مقرر نہیں کرے گا۔انہوں نے کہا کہ ہم دنیا میں ہونے والی دہشت گردی کی مذمت کرتے ہیں اور کسی بھی قسم کے اقدام پر ردعمل کا حق رکھتے ہیں جو ہمارے لوگوں کے حقوق کی پامالی کا باعث بنتا ہے۔
