راولپنڈی (این این آئی)رہنماء پی ٹی آئی بیرسٹر گوہر نے کہاہے کہ بدھ کی رات تک تمام لسٹیں فائنل کرلیں گے، سنی اتحاد کونسل سے ہمارا کبھی اتحاد نہیں ہوا،سپریم کورٹ کے فیصلے سے عوام کے بنیادی حقوق متاثر ، جمہوریت کیخلاف سازش کامیاب ہوئی ہے، پی ٹی آئی کے ووٹرز اور عہدیدار اختلافات میں نہ پڑیں۔

تفصیلات کے مطابق اڈیالہ جیل کے باہر میڈیا سے گفتگو کرتے ہوئے رہنما پی ٹی آئی بیرسٹر گوہر نے کہا کہ سپریم کورٹ کے فیصلے پر نظرثانی اپیل دائر کریں گے، پی ٹی آئی 3دنوں کے اندر اپنے امیدوار کی انتخابی نشانات کیساتھ لسٹ جاری کرے گی، عوام سے اپیل ہے پی ٹی آئی کے منتخب کردہ نمائندوں کو ووٹ دیگر کامیاب بنائیں، جو سیٹیں پینڈنگ میں رکھی تھی وہ جلدی فائنل ہو جائیں گی۔

بیرسٹر گوہر نے کہا کہ سپریم کورٹ کے بلے کے فیصلے سے 25کروڑ عوام کے بنیادی حقوق متاثر ہوئے ہیں ، جمہوریت کیخلاف ایک سازش کامیاب ہوئی ہے، جمہوریت کا بڑا نقصان ہوا ہے اس سے کرپشن کی ایک ابتداء ہوگی۔انہوں نے کہا کہ ہم کسی صورت الیکشن سے بائیکاٹ نہیں کریں گے، سپریم کورٹ کے فیصلے پر نظرثانی درخواست ہر صورت دائر کرنی ہے، آئین کے تحت کیا کسی پارٹی سے نشان واپس لیا جا سکتا ہے یا نہیں، قانون کے تحت اس کیس کو سپریم کورٹ کے 3رکنی بینچ نے نہیں 5رکنی بینچ کو سننا چاہئے تھا۔

انہوں نے کہاکہ بانی پی ٹی آئی عمران خان کا ووٹرز کو یہ مسیج ہے کہ گھبرانا نہیں ،اپنے ووٹ کی حفاظت کرنی ہے، آپ اپنے ووٹرز اور امیدوار کی پہچان کریں، 8فروری کو فتح آپ کی ہوگی آپ متحد رہیں۔انہوں نے کہا کہ بدھ کی رات 9بجے تک تمام لسٹیں فائنل کرلیں گے، سنی اتحاد کونسل سے ہمارا کبھی اتحاد نہیں ہوا، پاکستان کو جمہوری ملک بنانا چاہتے ہیں۔ انہوں نے کہا کہ شیخ رشید کے ساتھ اتحاد ہمارا پارلیمنٹ کے وقت تک تھا،ہم ہر حلقے میں اپنا امیدوار کھڑا کریں گے، پی ٹی آئی کے ووٹرز اور عہدیدار اختلافات میں نہ پڑیں۔