لاہور (این این آئی) مقبول پاکستانی اداکار و پروڈیوسر ہمایوں سعید نے انکشاف کیا ہے کہ کم عمری میں کی گئی پہلی محبت میں ناکامی پر میں ایک سال تک روتا رہا۔حال میں اداکار ہمایوں سعید نے نجی ٹی وی کے پروگرام میں بطور مہمان شرکت کی جہاں انہوں نے اپنے کیریئراور محبت سمیت مختلف موضوعات پر کھل کر اظہار خیال کیا۔ایک سوال کے جواب میں ہمایوں سعید کا کہنا تھا کہ اداکارہ ماہ نور بلوچ میرا پہلا کرش تھیں مگر اب میرا کوئی کرش نہیں رہا لیکن مجھے وہ تمام لڑکیاں اچھی لگتی ہیں جو اچھی ہوتی ہیں۔
یک طرفہ محبت سے متعلق پوچھے گئے ایک سوال پر انہوں نے اعتراف کیا کہ مجھے کم عمری میں یک طرفہ محبت ہوئی تھی جو کہ بعد میں دو طرفہ محبت میں تبدیل ہو گئی لیکن اس کے باوجود اس لڑکی نے مجھے دھوکا دیا۔انہوں نے بتایا کہ شادی سے قبل میں جس لڑکی سے پیار کرتا تھا اسے میں ڈرائیونگ سکھاتا تھا، میں گاڑی پر اس لڑکی کو ساحل سمندر بھی لے جایا کرتا تھا اور وہ لڑکی اپنے گھر والوں کو کہتی تھی کہ مجھے ہمایوں سعید پسند ہیں۔ہمایوں سعید کا کہنا تھا کہ بعد ازاں ایک دن اس لڑکی نے مجھے آکر کہا کہ وہ مجھ سے نہیں بلکہ فلاں لڑکے سے محبت کرتی ہے اور وہ آج سے کسی اور کی ہوگئی ہے جس پر میں بہت افسردہ ہوا یہاں تک کہ دوست کو واقعہ بتاتے ہوئے رو بھی پڑا۔اداکار کا مزیدکہنا تھا کہ پہلی محبت میں دھوکا ملنے کا غم میں ایک سال روتے ہوئے مناتا رہا، پھر میں نے اس لڑکی کو بھلا دیا۔
