پشاور(این این آئی)تحریک انصاف نے انتخابی نشان کیس پر الیکشن کمیشن کے فیصلے کے خلاف پشاور ہائیکورٹ سے رجوع کرنے کا فیصلہ کرلیا۔تحریک انصاف کے مرکزی ترجمان معظم بٹ نے بتایا کہ منگل کو الیکشن کمیشن کی جانب سے انتخابی نشان واپس لینے کے خلاف پشاور ہائیکورٹ جائیں گے،کیس سے متعلق پٹیشن تیارکرلی ہے۔
معظم بٹ نے کہا کہ کوشش ہوگی کہ پٹیشن منگل کو ہی سماعت کے لیے مقرر ہو، پٹیشن میں الیکشن کمیشن کا فیصلہ کالعدم کرنے کی استدعاکی گئی ہے اور پٹیشن میں مؤقف ہیکہ الیکشن کمیشن نے غیر قانونی فیصلہ کیا ہے۔پی ٹی آئی کے مرکزی ترجمان کے مطابق غیر متعلقہ شخص کی درخواست پر انتخابی نشان واپس لینا غیرقانونی ہے۔
