اسلام آباد (این این آئی)کاغذات نامزدگی جمع کرانے کے دوران پولیس اور انتظامیہ کی مداخلت کی شکایات پر الیکشن کمیشن آف پاکستان نے نوٹس لے لیا۔میڈیا رپورٹ کے مطابق ذرائع نے دعویٰ کیا کہ الیکشن کمیشن نے چیف سیکرٹری اور آئی جی پنجاب کو خط میں پولیس اور انتظامیہ کی مداخلت پر شدید تحفظات کا اظہار کیا۔

لاہور، سیالکوٹ، گجرات، حافظ آباد، بھکر، وزیرآباد اور گوجرانوالہ سے کاغذات نامزدگی جمع کرائے جانے کے دوران 60 سے زائد شکایات موصول ہوئیں ہیں۔ان شکایات پر نوٹس لیتے ہوئے الیکشن کمیشن آف پاکستان نے آئی جی پنجاب اور چیف سیکرٹری کو فوری طور پر اقدامات کرنے کی ہدایت کردی۔الیکشن کمیشن آف پاکستان نے خبر دار کیا کہ صاف وشفاف الیکشن کے انعقادمیں کسی قسم کی کوئی رکاوٹ برداشت نہیں کی جائے گی، امیدواروں کو ہراساں کرنے اور کاغذات نامزدگی جمع کرانے میں رکاوٹیں ڈالنے پر قانونی کارروائی کی جاسکتی ہے۔