لاہور( این این آئی)لاہور ہائیکورٹ کے جسٹس شجاعت علی خان نے پی ٹی آئی کے بانی چیئرمین کی پانچ سال کی نااہلی کے خلاف درخواست پانچ رکنی لارجر بنچ کو بھجوا دی۔لاہور ہائیکورٹ کے جسٹس شجاعت علی خان نے اپنے چیمبر میں پی ٹی آئی کے بانی چیئرمین کی پانچ سال کے لیے نااہلی کے خلاف درخواست پرسماعت کی۔درخواست گزار کی جانب سے علی ظفر اور سمیر کھوسہ پیش ہوئے۔

سماعت کے بعد لاہور ہائیکورٹ کے جسٹس شجاعت علی خان نے بانی چیئرمین پی ٹی آئی کی درخواست پانچ رکنی لارجر بنچ کو بھجوا دی۔عمران خان نے چیئرمین پی ٹی آئی بیرسٹر گوہر علی خان اور سینیٹر علی ظفر کی وساطت سے لاہور ہائیکورٹ میں درخواست دائر کی تھی۔درخواست میں موقف اختیار کیا گیا کہ الیکشن کمیشن نے 8اگست 2023کو بانی پی ٹی آئی کو پانچ سال کے لیے بطور رکن اسمبلی نااہل کیا،

الیکشن کمیشن نے درخواست گزار کو انتخابات سے باہر کرنے کے لیے غیر قانونی اقدام کیا۔دائر درخواست میں مزید کہا گیا کہ سپریم کورٹ کے احکامات پر الیکشن کی تاریخ کا اعلان ہوچکا ہے اور درخواست گزار الیکشن میں حصہ لینا چاہتا ہے، ان پر لگائے گئے الزامات بے بنیاد ہیں۔درخواست میں استدعا کی گئی کہ عدالت پانچ برس کی نااہلی کو کالعدم قرار دے اور درخواست کے حتمی فیصلے تک نااہلی کا نوٹیفکیشن معطل کیا جائے۔