پشاور (این این آئی)صوبائی دارالحکومت پشاور میں ورسک روڈ پر نجی بینک اور اسکول کے قریب دھماکے کے نتیجے میں 7 افراد زخمی ہو گئے ہیں جن میں بعض کی حالت نازک ہے جس کے باعث ہلاکتوں کا خدشہ ہے ۔ایل آر ایچ کے ترجمان نے بتایا کہ ورسک روڈ دھماکے کے 6 زخمیوں کو لیڈی ریڈنگ ہسپتال لایا گیا۔
ہسپتال کے ترجمان نے کہا کہ زخمیوں میں احمد جان، احسان اللہ، جاوید خان، ظاہر اللہ، سعد احمد اور یوسف خان شامل ہیں۔ترجمان کے مطابق زخمی بچوں کی عمر 7 سے 10 سال کے درمیان ہیں، 2 زخمی بچوں کی حالت تشویشناک ہے۔پولیس کے مطابق دھماکا بارودی مواد پھٹنے سے ہوا ہے۔ایس پی ورسک ارشد خان نے میڈیا سے گفتگو کرتے ہوئے کہا کہ دھماکا صبح 9 بج کر 10 منٹ پر ہوا، دھماکے میں 4 کلو گرام بارود استعمال کیا گیا۔
ایس پی ارشد خان نے بتایا کہ کون ٹارگٹ تھا یہ کہنا قبل از وقت ہو گا، دھماکے میں 3 بچے زخمی ہوئے ہیں۔انہوں نے بتایا کہ بارودی مواد سڑک کنارے سیمنٹ بلاک میں چھپایا گیا تھا، ارد گرد کے علاقوں میں سرچ آپریشن شروع کر دیا ہے، دھماکے میں بھتے کے عنصر کو بھی دیکھا جا رہا ہے۔میئر میٹرو پولیٹن زبیر علی نے میڈیا سے گفتگو کرتے ہوئے کہا کہ دھماکا اسکول کے قریب ہوا ہے، امن و امان کو خراب کرنے کے لیے دھماکا کیا گیا۔ زبیر علی نے کہا کہ تعلیمی اداروں کیقریب دھماکا افسوس ناک ہے۔
