اسلام آباد (این این آئی)نیپرا نے کے الیکٹرک سمیت تمام تقسیم کار کمپنیوں کیخلاف قانونی کارروائی کا فیصلہ کرلیا۔ تفصیلات کے مطابق بجلی کی تقسیم کار کمپنیوں کیخلاف اوور بلنگ پر نیشنل پاور ریگولیٹری اتھارٹی کی انکوائری کمیٹی نے تحقیقات مکمل کرلی ہے جس کے بعد نیپرا نے کے الیکٹرک سمیت تمام تقسیم کار کمپنیوں کیخلاف قانونی کارروائی کا فیصلہ کیا ہے۔

نیپرا اعلامیہ میں کہا گیا ہے کہ تحقیقات میں بجلی کی تقسیم کار کمپنیوں کی جانب سے ایوریج بل بھیجنے اور 30دن سے زائد عرصے کی بلنگ کرنے کا انکشاف ہوا ہے۔نیپرا کے اعلامیہ کے مطابق خراب میٹرز کو جلد از جلد تبدیل کرنے اور غلط بلوں کو درست کرنے کاحتمی وقت دے دیا گیا ہے۔ بجلی کمپنیوں کو 30 دنوں میں خراب میٹرز کو تبدیل کرنے کی ہدایت کی گئی ہے۔ اعلامیہ کے مطابق مقررہ وقت تک عملدرآمد نہ کرنے پر کمپنیوں کیخلاف کارروائی کی جائے گی۔ اعلامیہ میں کہا گیا ہے کہ پالیسی کے مطابق میٹرز تبدیل نہ کرنے پر کے الیکٹرک کو نوٹس جاری کیا گیا ہے۔ اعلامیہ کے مطابق نیپرا نے معاملے پر کے الیکٹرک سے وضاحت طلب کرلی ہے۔