ممبئی (این این آئی)سابق بالی ووڈ اداکارہ ثنا خان نے اسرائیلی اداکارہ گال گیڈوٹ کو غزہ میں جنگ بندی کی مخالفت کرنے پر آڑے ہاتھوں لے لیا۔ثنا خان نے اپنی انسٹا اسٹوری پر گال گیڈوٹ کے ایک حالیہ انٹرویو کا ویڈیو کلپ شیئر کیا ہے جس میں اسرائیلی اداکارہ کو یہ کہتے ہوئے سنا جا سکتا ہے کہ میں اپنے آپ سے پوچھتی ہوں کہ انسانیت کو کیا ہو گیا ہے؟
ہمیں جنگ بندی کا مطالبہ کرنے والوں کو یہ سمجھانے کی ضرورت کیوں پیش آ رہی ہے کہ جنگ بندی کرنا ٹھیک نہیں ہے؟۔گال گیڈوٹ نے کہا کہ میں صرف امن چاہتی ہوں، مجھے غلط مت سمجھیں لیکن اسرائیلی اب بھی یرغمال ہیں، اغوا کاروں کے بارے میں کوئی ایک لفظ نہیں بول رہا لیکن سب جنگ بندی کا مطالبہ کر رہے ہیں، سب کو ہو کیا گیا ہے؟۔ثنا خان نے گال گیڈوٹ کے جنگ بند کی مخالفت کرنے پر برہمی کا اظہار کرتے ہوئے اپنی اسٹوری کے کیپشن میں لکھا ہے کہ اسے ونڈر ویمن کس نے بنایا ہے؟۔انہوں نے لکھا ہے کہ یہ جنگ یرغمالیوں کیلئے نہیں ہے کیونکہ اگر اسرائیل کو یرغمالیوں کی حقیقت میں کوئی پرواہ ہوتی تو وہ کبھی یوں بم باری نہ کرتا ۔ثنا خان نے آخر میں لکھا ہے کہ وہ صرف غزہ کے لوگوں کی نسل کشی کرنا چاہتا ہے جو کبھی نہیں ہو گی۔
