لاہور ( این این آئی) پاکستان کرکٹ بورڈ نے شان مسعود کی قیادت میں دور آسٹریلیا کے لیے پاکستان کے 18رکنی ٹیسٹ سکواڈ کا اعلان کردیا جس میں صائم ایوب اور خرم شہزاد کو پہلی بار ٹیسٹ ٹیم میں شامل کیا گیا جبکہ میرحمزہ، محمد وسیم جونیئر اور فہیم اشرف کی ٹیسٹ ٹیم میں واپسی ہوئی ہے،
اس دورہ میں پاکستان کرکٹ ٹیم 14دسمبر سے 7جنوری کے درمیان تین ٹیسٹ میچوں کی سیریز کھیلے گی۔چیف سلیکٹر قومی کرکٹ ٹیم وہاب ریاض نے لاہور قذافی سٹیڈیم میں پریس کانفرنس کرتے ہوئے ٹیسٹ اسکواڈ کا اعلان کیا۔ یہ چیف سلیکٹر بننے کے بعد وہاب ریاض کا پہلا اسائنمٹ ہے۔ بائیں ہاتھ سے بیٹنگ کرنے والے 34سالہ شان مسعود پہلی بار پاکستان کی ٹیسٹ ٹیم کی قیادت کریں گے۔
انہیں ورلڈ ٹیسٹ چمپئن شپ25-2023کے لیے قیادت کی ذمہ داری بابراعظم کی جگہ سونپی گئی ہے جو گزشتہ ہفتے ٹیسٹ کپتانی سے دستبردار ہوگئے تھے۔بائیں ہاتھ کے اوپننگ بیٹر صائم ایوب اور فاسٹ بولر خرم شہزاد پہلی مرتبہ پاکستان کی ٹیسٹ ٹیم میں شامل کیے گئے ہیں۔ 22سالہ صائم ایوب نیاس سیزن کی قائداعظم ٹرافی کے چار میچوں میں تین سنچریوں کی مدد سے553رنز بنائے جس میں فیصل آباد کے خلاف فائنل میں میچ وننگ ڈبل سنچری قابل ذکر تھی۔
انہوں نے اپنی شاندار فارم کو جاری رکھتے ہوئے پاکستان کپ ایکروزہ ٹورنامنٹ میں بھی سب سے زیادہ 397رنز بنائے اور وہ ٹورنامنٹ کے بہترین بیٹر قرار پائے۔فیصل آباد سے تعلق رکھنے والے دائیں ہاتھ کے 23سالہ فاسٹ بولر خرم شہزاد نے اس سال قائداعظم ٹرافی میں 20.31کی اوسط سے سب سے زیادہ 36وکٹیں حاصل کی ہیں۔انہوں نے پاکستان کپ ایکروزہ ٹورنامنٹ میں بھی عمدہ بولنگ کرتے ہوئے 13 وکٹیں حاصل کیں۔
پیس آل رائونڈر فہیم اشرف جو آخری مرتبہ ٹیسٹ میچ انگلینڈ کے دور پاکستان میں کھیلے تھے ٹیم میں واپس آئے ہیں اسی طرح محمد وسیم جونیئر اور میرحمزہ کی بھی ٹیسٹ ٹیم میں واپسی ہوئی ہے۔یہ دونوں نیوزی لینڈ کے خلاف ہوم سیریز میں ٹیم کا حصہ تھے جو دسمبر، جنوری میں کھیلی گئی تھی۔پاکستان کے اٹھارہ رکنی سکواڈ میں شان مسعود (کپتان ) ،عامرجمال، عبداللہ شفیق، ابرار احمد، بابراعظم، فہیم اشرف، حسن علی، امام الحق، خرم شہزاد، میرحمزہ، محمد رضوان، محمد وسیم جونیئر، نعمان علی، صائم ایوب، سلمان علی آغا، سرفراز احمد، سعود شکیل اور شاہین شاہ آفریدی شامل ہیں ۔
چیف سلیکٹر وہاب ریاض نے ٹیم کے سلیکشن پر کہا کہ ٹیم آسٹریلیا کی چیلنجنگ کنڈیشنز کو مد نظر رکھتے ہوئے منتخب کی گئی ہے۔ وہاں کی پچز کو ذہن میں رکھتے ہوئے تیز بولرز زیادہ ٹیم میں رکھے گئے ہیں تاکہ تین ٹیسٹ میچوں میں کامبی نیشن تیار کرنے میں آسانی رہے۔انہوں نے کہا کہ صائم ایوب کو ڈومیسٹک کرکٹ میں شاندار پرفارمنس پر ٹیم میں شامل کیا گیا ہے انہوں نے قائداعظم ٹرافی اور پاکستان کپ دونوں میں متاثرکن کارکردگی دکھائی ہے۔ان کی شمولیت سے ٹیم کی بیٹنگ مزید مضبوط ہوگی جو پہلے ہی مضبوط ہے۔ پاکستان نے آئی سی سی ورلڈ ٹیسٹ چمپئن شپ کا آغاز اس سال سری لنکا میں جیت سے کیا ہے اور امید ہے کہ ٹیم آسٹریلیا میں بھی اس مومینٹم کو برقرار رکھے گی۔
ہم نے کوشش کی ہے کہ سلیکشن میں وہ تمام ضروری وسائل شامل کیے جائیں جن سے آسٹریلیا میں کامیابی حاصل کرنے میں مدد مل سکے۔پاکستان کا اسکواڈ 22نومبر کو ٹریننگ کیمپ کے لیے راولپنڈی میں جمع ہوگا یہ کیمپ 23سے 28نومبر تک پنڈی اسٹیڈیم میں جاری رہے گا۔ ٹیم 30نومبر کو لاہور سے روانہ ہوگی۔پاکستان کرکٹ بورڈ نے ٹریننگ کیمپ کے لیے چند اضافی کھلاڑیوں کو بھی مدعو کیا ہے ان میں ارشد اقبال، کاشف علی، شاداب خان، شاہنواز دھانی، محمد نواز، عثمان قادر اور اسامہ میر شامل ہیں۔شیڈول کے مطابق دونوں ٹیموں کے درمیان پہلا ٹیسٹ 14سے18دسمبر تک پرتھ میں کھیلا جائے گا ، دوسرا ٹیسٹ 26سے 30 دسمبر تک میلبرن اور تیسرا ٹیسٹ 3سے7 جنوری تک سڈنی میں کھیلا جائے گا۔
