لاہور ( این این آئی) چیئرمین پاکستان کرکٹ بورڈ مینجمنٹ کمیٹی ذکاء اشرف نے ورلڈکپ میں ناقص کارکردگی کی بنیاد پر سلیکشن کمیٹی کو فارغ کردیا۔تفصیلات کے مطابق عبوری چیف سلیکٹر توصیف احمد، وجاہت اللہ واسطی اور وسیم حیدر شامل تھے، نئی سلیکشن کمیٹی کا اعلان ایک دو روز میں متوقع ہے۔
نئے چیف سلیکٹر کیلئے پاکستان کرکٹ بورڈ نے سابق کرکٹرز سے رابطے بڑھانا شروع کردیئے ہیں۔دوسری جانب دورہ آسٹریلیا کے لئے عبوری سلیکشن کمیٹی ہی اسکواڈ منتخب کرے گی۔ذکا اشرف نے پاکستان کرکٹ ٹیم کے کپتان بابر اعظم کو بھی بدھ کو طلب کرلیا جبکہ ڈائریکٹر کرکٹ مکی آرتھر بھی بدھ کو لاہور پہنچیں گے۔مکی آرتھر اور مینجر ریحان الحق ذکا اشرف سے ملاقات میں اپنی رپورٹس پیش کریں گے۔
بابر اعظم، مکی آرتھر اور سابق کرکٹرز کی رپورٹس کی روشنی میں قومی ٹیم سے متعلق فیصلے کیے جائیں گے۔آئی سی سی ورلڈکپ کے دوران پی سی بی نے ناقص کارکردگی پر انضمام الحق کا استعفیٰ منظور کیا تھا۔قبل ازیں میگا ایونٹ میں قومی ٹیم کے بائولنگ کوچ مورنی مورکل نے پاکستان کرکٹ بورڈ سے راہیں جدا کرلیں تھیں جبکہ فاسٹ بولر کا بورڈ کے ساتھ معاہدہ ختم ہونے میں ایک ماہ باقی تھا۔
