لاہور( این این آئی) پاکستان مسلم لیگ (ن) کے قائد نواز شریف نے کہا ہے کہ قوم کی غریب حالت دیکھ کر دل دکھی ہو جاتا ہے، معاشی ترقی کے لئے ڈبل سپیڈ سے کام کرنا ہوگا، زراعت، صنعت، آئی ٹی کو فروغ دینا ہے،مہنگائی کس کے دور میں ہوئی،بجلی مہنگی کس نے کی،سب سے زیادہ قرض کس کے دور میں لیا گیا؟ یہ سب ہم نے تو نہیں کیا،ان شااللہ مل کر ملک اور قوم کو مسائل سے نکالنے کی جدوجہد کریں گے۔
ان خیالات کا اظہار انہوںنے متحدہ قومی موومنٹ کے وفد سے ملاقات کے موقع پر گفتگو کرتے ہوئے کیا۔ نواز شریف نے کہاکہ ایم کیو ایم کے ساتھ اشتراک ملک وقوم کو مسائل سے نکالنے کے لئے مثبت پیشرفت ہے، ہمیں صرف پاکستان کی ترقی چاہیے، سندھ، بلوچستان، خیبرپختونخوا، پنجاب، آزاد جموں و کشمیر اور گلگت بلتستان سب کی یکساں ترقی چاہتے ہیں، پاکستان کے ہر علاقے کی ترقی ہماری ترجیح رہی ہے، کبھی امتیاز برتا نہ برتیں گے۔
انہوں نے کہا کہ پچاس سال سے زیر التوا ء لواری ٹنل کا منصوبہ ہم نے مکمل کیا، علاقے کے عوام لواری ٹنل کے مکمل ہونے پر خوش ہیں، گھنٹوں کے اضافی سفر سے انہیں نجات ملی، 1972ء سے لواری ٹنل کا سنتے آرہے تھے، لیکن الحمد اللہ ہم نے اسے مکمل کیا،ہزارہ موٹر وے ہم نے بنائی، آج عوام کو اس فائدہ مل رہا ہے، ہمارے بنانے منصوبوں سے عوام کا بھلا ہو رہا ہے، خیبرپختونخوا ہ سے چترال شاہراہ بننے سے فاصلے کم ہوئے، عوام کی زندگی میں آسانی آئی۔
نواز شریف نے کہا کہ چار سال ڈالر 104 روپے پر رہا، ہم نے ڈالر کو ہلنے نہیں دیا، الحمد اللہ ہم نے اپنے دور میں آٹے، چینی کی قیمت ہلنے نہیں دی، سبزی سمیت کھانے پینے کی تمام اشیا ء سستی قیمت پر دستیاب تھیں، شہباز شریف کو ایسے وقت ذمہ داری ملی جب ملک عملاًدیوالیہ ہو چکا تھا، مہنگائی کس کے دور میں ہوئی،بجلی مہنگی کس نے کی،سب سے زیادہ قرض کس کے دور میں لیا گیا؟ یہ سب ہم نے تو نہیں کیا، ہم نے آئی ایم ایف کو خدا حافظ کہہ دیا تھا،اس کے بعد قوم کو عہد کرنا تھا کہ پھر آئی ایم ایف کے پاس نہیں جائیں گے،
دکھ کی بات ہے کہ ہمارے دور میں جو روٹی چار روپے کی تھی، وہ 30 روپے کی ہوگئی، میں بڑے دکھی دل سے یہ باتیں کرتا ہوں، قوم کی غریب حالت دیکھ کر دل دکھی ہو جاتا ہے۔ انہوں نے کہا کہ تھرکول جیسے منصوبے ملک و قوم کی غربت مٹا سکتے ہیں، ان منصوبوں کی ترقی کے لئے سوچنا چاہیے، معاشی ترقی کیلئے ڈبل سپیڈ سے کام کرنا ہوگا، زراعت، صنعت، آئی ٹی کو فروغ دینا ہے۔ اس موقع پر مسلم لیگ (ن) کے صدر و سابق وزیر اعظم شہباز شریف نے گفتگو کرتے ہوئے کہا کہ 16 ماہ کی مخلوط حکومت میں ایم کیو ایم نے بڑے بھرپور اور مثبت انداز میں ساتھ دیا،
ایم کیو ایم کے تعاون کے حوالے سے قائد نواز شریف کو آگاہ کرتا رہا ہوں، 16 ماہ کے دوران ہم نے سیاسی نقصان کی پرواہ نہیں کی، پاکستان کا نقصان نہیں ہونے دیا۔ا نہوں نے کہا کہ کراچی کے عوام کے لئے مختلف ترقیاتی منصوبوں پر کام کیا، کے فور، یونیورسٹی سمیت دیگر منصوبوں کے لئے اربوں روپے فراہم کئے گئے، کراچی کے عوام کی سہولت کے منصوبے نوازشریف کے دل کے ہمیشہ قریب رہے ہیں۔ انہوںنے کہا کہ بڑی کمٹمنٹ کے ساتھ نوازشریف نے کراچی کا امن بحال کیا تھا، مستقبل میں ایم کیو ایم کے تعاون اور اشتراک سے کراچی اور سندھ کے عوام کی بھرپور خدمت کریں گے۔
