اسلام آباد(این این آئی)صدر ڈاکٹر عارف علوی اورچیف الیکشن کمشنر سکندر سلطان راجہ کے درمیان 8فروری 2024کو عام انتخابات کرانے پر اتفاق ہوگیا۔الیکشن کمیشن کی جانب سے جاری اعلامئے کے مطابق صدر مملکت اور چیف الیکشن کمشنر کے درمیان عام انتخابات 8فروری 2024کو کرانے پر اتفاق ہوا ہے۔

واضح رہے کہ جمعرات کو ملک میں 90روز میں انتخابات سے متعلق کیس کی سماعت کے دوران الیکشن کمیشن کے وکیل نے سپریم کورٹ کو بتایا تھا کہ الیکشن کمیشن 11فروری 2024کو ملک میں الیکشن کروانے کیلئے تیار ہے جس پر عدالت نے الیکشن کمیشن کو حکم دیا کہ صدر مملکت سے مشاورت کر کے جمعہ کو عدالت میں الیکشن کی تاریخ سے متعلق آگاہ کیا جائے۔

سپریم کورٹ کے حکم پر چیف الیکشن کمشنر سکندر سلطان راجہ اور اٹارنی جنرل منصور عثمان نے صدر عارف علوی سے ملاقات کی ، اس موقع پر الیکشن کمیشن کے ارکان بھی موجود تھے۔ذرائع کے مطابق ایک گھنٹے سے زائد جاری رہنے والی ملاقات میں عام انتخابات کیلئے صدر مملکت کے سامنے 3تاریخیں رکھی گئیں ۔

ذرائع کے مطابق الیکشن کمیشن نے 28جنوری ، 4فروری اور 11فروری کی تاریخوں پر رائے دی،تاہم الیکشن کمیشن کی جانب سے 11فروری کو انتخابات کیلئے موزوں قرار دیا گیا۔ذرائع کے مطابق چیف الیکشن کمشنر صدر سے ملاقات کے بعد ایوان صدر سے روانہ ہوکر الیکشن کمیشن پہنچے جہاں انہوں نے صدر مملکت کو خط لکھتے ہوئے ملک میں 11فروری کو الیکشن کرانے کی تجویز دی۔

الیکشن کمیشن نے کہا کہ سپریم کورٹ کی ہدایات پر عمل کرتے ہوئے 11فروری کو عام انتخابات کی تاریخ تجویز کرتے ہیں۔ذرائع کے مطابق صدرمملکت ڈاکٹر عارف علوی اور چیف الیکشن کمشنر سکندر سلطان راجہ کے درمیان ملاقات میں الیکشن کی تاریخ پر اتفاق نہ ہوسکا جس کے بعد اٹارنی جنرل صدر مملکت کا پیغام لے کر چیف الیکشن کمشنر کے پاس گئے اور صدر مملکت کا موقف چیف الیکشن کمشنر کے سامنے رکھا ۔

بعد ازاں الیکشن کمیشن اور صدر مملکت میں 8 فروری کو انتخابات کرانے پر اتفاق رائے ہوگیا۔ دوسری جانب ایوان صدر سے جاری بیان اور ترجمان الیکشن کمیشن کی جانب سے جاری اعلامئے میں بھی کہا گیا ہے کہ صدر مملکت اور چیف الیکشن کمشنر کے درمیان ملک بھر میں عام انتخابات 8 فروری 2024ء کو کرانے پر اتفاق کیا گیا ہے۔