راولپنڈی (این این آئی)پاکستان اور آذر بائیجان نے مسلح افواج میں باہمی تعاون کو نئی سطح تک بڑھانے کے عزم کا اظہار کیا ہے۔آئی ایس پی آر کے مطابق چیف آف آرمی سٹاف جنرل سید عاصم منیر نشان امتیاز (ملٹری)کا آذربائیجان پہنچنے پر پرتپاک استقبال کیا گیا ۔آئی ایس پی آر کے مطابق آرمی چیف نے جمہوریہ آذربائیجان کے صدر الہام علیوف وزیردفاع، پہلے نائب وزیر،چیف آف جنرل سٹاف اور ایئرفورس کے کمانڈر سے ملاقات کی۔
آرمی چیف نے آذربائیجان کی مسلح افواج کی آپریشنل تیاریوں اور حوصلے کو سراہا۔آذربائیجان کی سیاسی و عسکری قیادت نے بھی پاکستان کی جانب سے آذربائیجان کی مسلسل حمایت کو سراہا۔ ملاقات میں دونوں ریاستوں، مسلح افواج میں باہمی تعاون کو نئی سطح تک بڑھانے کے عزم کا اظہار کیا گیا۔آئی ایس پی آر کے مطابق جنرل سٹاف ہیڈ کوارٹرز آمد پر آرمی چیف کا پرتپاک استقبال کرتے ہوئے گارڈ آف آنر پیش کیا گیا، چیف آف آرمی سٹاف نے باکو میں یادگار شہدا پر پھول بھی رکھے۔بیان میں کہا گیا ہے کہ آرمی چیف کے دورے کا مقصد دونوں برادر ممالک کے درمیان فوجی اور دفاعی تعاون بڑھانا ہے۔
