کراچی /اسلام آباد(این این آئی)پی آئی اے کی ڈوبتی کشتی کو وفاق کا سہارا،نئے قرض ملنے کی امید پیدا ہوگئی ،پی آئی اے کیلئے 20 ارب روپے کا نیا قرض اور حکومتی قرض 6 ماہ کیلئے ری شیڈول کیے جانے کا امکان ہے ۔ ذرائع وزارت خزانہ ڈویژن کے مطابق پی آئی اے کو نیا قرض دینے کیلئے وزارت خزانہ کی کمرشل بنکوں کو ہدایات جاری کر دی گئیں ،پی آئی اے کو قرض دلوانے کیلئے وزیراعظم آفس سے بھی ہدایات دیں گئیں ۔

ذرائع کے مطابق نیشنل بنک، بنک آف پنجاب سمیت 8 کمرشل بنک پی آئی اے کو نیا قرض دیں گے، پی آئی اے کا حکومتی گارنٹی پر کمرشل بنکوں سے 260 ارب روپے کا قرض ہے۔ذرائع خزانہ ڈویژن کے مطابق پی آئی اے کی نجکاری ہونے تک حکومتی قرض 6 ماہ کیلئے ریشیڈول کیا جائے گا، اس سے قبل پی آئی اے کا حکومتی قرض 2 سال کیلئے ریشیڈول کرنے کا پلان تھا۔ذرائع خزانہ ڈویژ ن کے مطابق پی آئی اے کی جانب سے دو ماہ کے دوران تقریبا 40 ارب روپے قرض لینے کیلئے درخواست کی گئی۔