اسلام آباد(این این آئی)ترجمان دفتر خارجہ نے کہاہے کہ فلسطین کی صورتحال پر پاکستان کھل کر موقف دے چکا ہے، پاکستان غزہ میں جلد سے جلد جنگ بندی پر زور دے رہا ہے، مسئلہ فلسطین پردوبارہ سے مذاکرات کی ضرورت ہے،مقبوضہ کشمیر میں بھارت کے ناپاک عزائم پر پوری نظر ہے، مقبوضہ کشمیر میں بھارت کا 2019کا اقدام ناقابل قبول ہے۔

ممتاززہرابلوچ نے ایک ٹی وی پروگرام میں گفتگوکرتے ہوئے کہاکہ غزہ کی صورتحال پر او آئی سی ممالک کے ساتھ رابطے میں ہیں،کسی بھی تنازع کا حل صرف سفارتی سطح پرہی نکالا جاسکتا ہے۔ترجمان نے کہاکہ پاکستان غزہ کی صورتحال پر او آئی سی کے متفقہ موقف کیلئے کردار ادا کرے گا،غزہ تک امداد کی فراہمی کیلئے اقوام متحدہ ایجنسیوں سے رابطے میں ہیں۔

انہوں نے کہاکہ جنگ کسی بھی مسئلے کا حل نہیں، مسئلہ فلسطین پردوبارہ سے مذاکرات کی ضرورت ہے۔ترجمان دفترخارجہ ممتاززہرابلوچ نے کہا کہ مقبوضہ کشمیر میں بھارت کے ناپاک عزائم پر پوری نظر ہے، مقبوضہ کشمیر میں بھارت کا 2019کا اقدام ناقابل قبول ہے۔انہوںنے عالمی برادری پر زور دیا ہے کہ بھارت پر یکطرفہ اقدامات کی واپسی کیلئے دبائو ڈالیں، 2019مقبوضہ کشمیر جیسے یکطرفہ اقدامات ہی آگے انسانی بحران میں بدل جاتے ہیں۔