لاہور( این این آئی)ضلعی انتظامیہ نے پاکستان مسلم لیگ (ن) کو 21 اکتوبر کو مینار پاکستان پر جلسے کی باضابطہ اجازت دے دی۔مسلم لیگ (ن) کی جانب سے سابق صوبائی وزیر بلال یاسین نے جلسے کی اجازت کی درخواست دی تھی۔ضلعی انتظامیہ نے بلال یاسین کی جانب سے کسی بھی ناخوشگوار واقعہ کی مکمل ذمہ داری لینے کا حلف نامہ لینے کے بعد جلسے کے لئے این او سی جاری کیا۔
ضلعی انتظامیہ نے این او سی میں 39نکات کی پاسداری کی ہدایت کی ہے جس میں کہا گیا ہے کہ جلسے کے منتظمین پارکس اینڈ ہارٹیکلچرل اتھارٹی سے علیحدہ اجازت لیں گے اور متعلقہ واجبات بھی لازمی ادا کریں گے ،منتظمین خواتین و مردوں کے انکلوژر ، سٹیج اور پنڈال کی سکیورٹی اور بھگڈر سے بچائو کے لئے رضاکاروں اور نجی سکیورٹی اداروں کی مدد لیں گے، سکیورٹی اور ٹریفک کی روانی برقرار رکھنے کے لئے متعلقہ ایس پی اور ٹریفک حکام سے معاونت کے لئے منتظمین کوارڈی نیٹرز کی نامزدگی کریں گے۔
مزید کہا گیا ہے کہ منتظمین ایس پی سٹی اور ایس پی سکیورٹی سے مکمل رابطے میں رہیں گے، ٹریفک پولیس کی جانب سے مکمل پلان اور ایڈوائزری جاری کی جائے گی، گریٹر اقبال پارک میں قائم تنصیبات کو کسی قسم کے مالی نقصان کا پی ایچ اے کو ایک ماہ کے اندر ازالہ/مداوا کیاجائے گا، جلسہ گاہ میں سائونڈ سسٹم کے لئے پنجاب ساونڈ سسٹم آرڈیننس 2015 پر مکمل عملدرآمد کیا جائے گا، جلسہ گاہ میں سائونڈ سسٹم پر آواز کم رکھی جائے گی،
منتظمین ضلعی پولیس کی ہدایات کے مطابق ضروری جگہوں پر کنٹینر زلگائیں گے، پنڈال میں کنٹینرز پر مشتمل اسٹیج بنا کر اس کے اطراف لوہے کے پائپوں کا جال کھڑا کیا جائے گا، وی آئی پی گیٹ اور ایریا میں کسی غیر متعلقہ شخص کو نہیں آنے دیا جائے گا، انٹری گیٹس پر تعینات رضا کار شرکا ء کو قطاروں میں اندر جانے میں مدد دیں گے،بجلی کی بلاتعطل فراہمی کے لئے جنریٹرز لگائے جائیں گے، چھوٹے بچوں کو پنڈال میں آنے کی اجازت نہیں ہو گی، جلسے کے لئے کسی کو اپنا کاروبار بند کرنے پر مجبور نہیں کیا جائے گا، جلسہ گاہ سے باہر کوئی ریلی یا جلوس نہیں نکالا جائے گا،
آئینی اداروں، افواج پاکستان اور عدلیہ کے خلاف کوئی تقاریر نہیں ہوں گی، ڈنڈوں وغیرہ کے ساتھ کسی کو پنڈال میں داخلے کی اجازت نہیں ہو گی، اسلحہ کی نمائش پر مکمل پابندی ہو گی اور آتش بازی بھی نہیں کی جائے گی، جلسے کے لئے شہر میں چاک بندی نہیں کی جائے گی اور نہ ہی جلسے کے لئے اعلانات کئے جائیں گے، سٹیمرز اور بینرز پی ایچ اے کی اجازت کے بعد منظور شدہ مقامات پر لگائے جائیں گے، پرامن ماحول برقرار رکھا جائے گا اور اشتعال انگیز نعرے نہیں لگائے جائیں گے، جلسے میں شرکت کے لئے کسی کو مجبور نہیں کیا جائے گا،امن و امان برقرار رکھنے کے لئے گاڑیوں اور شرکا ء کی تلاشی میں کوئی رکاوٹ نہیں ڈالی جائے گی، جلسے میں کسی سیاسی و مذہبی جماعت کے جھنڈے کو نذرآتش نہیں کیا جائے گا، ٹریفک پولیس کے متعین کردہ مقامات پر گاڑیاں کھڑی کی جائیں گی۔
