کراچی(این این آئی)سابق وفاقی وزیرفیصل واوڈا نے کہاہے کہ ملک کی تباہی کی ذمہ داریہی جماعتیں ہیں جوآج درستگی کی بات کرتی ہیں، نوازشریف وزیراعظم بن بھی گئے تو 13 سے17 ماہ ہی چلیں گے، نوازشریف کو باہر بھیجنے میں پی ٹی آئی حکومت ملوث تھی۔خصوصی گفتگو کرتے ہوئے انہوں نے کہا کہ ملک کی تباہی کی ذمہ داریہ ہی جماعتیں ہیں جوآج درستگی کی بات کرتی ہیں،
9 مئی کے واقعات پر کہا جاتا ہے پی ٹی آئی نے ا نتہائی غلط کام کیا، ن لیگ نے بھی آرمی چیف کے جہازکوہائی جیک کرنے کی کوشش کی تھی۔پی ٹی آئی کو بند کر دیا گیا اور ن لیگ کومیڈل پہنائے جارہے ہیں، ملک میں نظام ہی تباہ ہے تودرستگی کیسے ہوسکتی ہے۔انہوں نے کہا کہ پہلے ہی تاثر دیا جا رہا ہے کہ نوازشریف جیل نہیں جائیں گے، پی ڈی ایم حکومت نے16ماہ میں اپنے کیسزمعاف کرانے کے علاوہ کیاکیاہے؟
ن لیگ بیانیہ تنقید تک لائے گی اوراس کے علاوہ کچھ نہیں کرے گی۔انہوں نے اعتراف کیا کہ نوازشریف کو باہر بھیجنے میں پی ٹی آئی حکومت ملوث تھی۔فیصل واوڈا نے دعویٰ کیا کہ آئندہ 35 دن میں جمہوری نظام کیساتھ سب چیزوں کو باندھ دیا جائے گا، اس کے بارے میں مزید وضاحت 36 ویں دن کروں گا، نظام کواب صفائی کی ضرورت ہے، جمہوریت بھی رہے گی اورصفائی کی بھی ضرورت ہے۔انہوں نے کہاکہ قوم نے سسٹم کااپنے بچوں کیساتھ سلوک ایساہی دیکھناہے تواب کھڑاہونا ہوگا۔
