د بئی (این این آئی)ورلڈ کپ میں سری لنکا کے خلاف شاندار فتح کے بعد پاکستان کرکٹ ٹیم کے وکٹ کیپر محمد رضوان کے ٹوئٹ پر انٹرنیشنل کرکٹ کونسل نے کہا ہے کہ محمد رضوان کا ٹوئٹ ان کے دائرہ اختیار سے باہر ہے ۔
انٹرنیشنل کرکٹ کونسل (آئی سی سی)نے کہا کہ سری لنکا کے خلاف پاکستان کی جیت کے بعد غزہ سے متعلق محمد رضوان کاٹوئٹ ان کے دائرہ اختیار سے باہر ہے۔برطانوی میڈیا کے مطابق آئی سی سی کے ترجمان نے اس حوالے سے کہا کہ یہ کھیل کے میدان اور آئی سی سی کے دائرہ اختیار سے باہر ہے۔ترجمان آئی سی سی نے کہا کہ فرد اور ان کے بورڈ پر منحصر ہے کہ وہ اپنے انفرادی پلیٹ فارم کو کس طرح استعمال کرنا چاہتے ہیں۔
یاد رہے کہ پاکستان کرکٹ ٹیم کے وکٹ کیپر و بلے باز محمد رضوان نے سری لنکا کے خلاف 131 رنز کی ناقابلِ شکست اننگز اور ٹیم کی شاندار فتح کو غزہ کے مظلوموں کے نام کر دیا تھا۔سماجی رابطے کی ویب سائٹ ایکس (سابق ٹوئٹر)پر پوسٹ شیئر کرتے ہوئے قومی ٹیم کے کھلاڑی نے پاکستان کی جیت پر اظہارِ خیال کیا تھا اور اسے اسرائیل کی وحشیانہ کارروائیوں کا نشانہ بننے والے معصوم فلسطینیوں کے نام کر دیا تھا۔انہوں نے لکھا تھا کہ یہ غزہ میں ہمارے بھائیوں اور بہنوں کے لیے تھا۔
