برسلز(این این آئی)فوجی طیارے میں سوار امریکی جوائنٹ چیفس آف اسٹاف کے چیئرمین جنرل چارلس بران نے ایران کو اسرائیل کے بحران میں ملوث ہونے کے نتائج سے خبردار کرتے ہوئے کہا کہ وہ نہیں چاہتے کہ تنازعہ پھیلے۔غیرملکی خبررساں ادارے کے مطابق ایران کے لیے ان کے پیغام کے بارے میں پوچھے جانے پر بران نے کہا کہ ہم چاہتے ہیں کہ ایران اس معاملے میں عدم مداخلت کی پالیسی پر چلے۔
انھوں نے اپنے ساتھ برسلز جانے والے صحافیوں کے ایک چھوٹے سے گروپ سے بات کرتے ہوئے کہا کہ ہم ایک ٹھوس پیغام دینا چاہتے ہیں۔ ہم نہیں چاہتے کہ یہ معاملہ پھیلے۔ اہم بات یہ ہے کہ ایران اس پیغام کو سمجھے۔یہ انتباہ اقوام متحدہ میں ایرانی مشن کی جانب سے طوفان الاقصی حملے میں تہران کے ملوث ہونے کی تردید کے بعد سامنے آیا ہے۔ انہوں نے فلسطینی دھڑوں کے اس دعوے کی تردید کی تھی جس میں کہا تھا کہ ایران نے اسرائیل پر حملے میں فلسطینیوں کی مدد کی ہے۔اقوام متحدہ میں ایرانی مشن نے طوفان الاقصی حملے میں تہران کے ملوث ہونے کی تردید کرتے ہوئے کہا کہ ایران کا اس کارروائی میں کوئی کردار نہیں۔
