مکوآنہ (این این آئی)ملک میں پٹرولیم مصنوعات کی درآمدات میں جاری مالی سال کے پہلے 10 ماہ میں سالانہ بنیادوں پر 22 فیصد کی کمی ریکارڈ کی گئی ہے۔ او سی اے سی اور اوگرا کی جانب سے اس حوالہ سے جاری کردہ اعداد و شمار کے مطابق جولائی سے اپریل 2023ء تک کی مدت میں 20449000 ٹن پٹرولیم مصنوعات کی درآمدات ریکارڈ کی گئی ہیں جو گذشتہ مالی سال کی اسی مدت کے مقابلہ میں 22 فیصد کم ہے۔
گذشتہ مالی سال کی اسی مدت میں 26063000 ٹن پٹرولیم مصنوعات کی درآمدات ریکارڈ کی گئی تھیں۔ اپریل میں 1816000 ٹن پٹرولیم مصنوعات کی درآمدات ہوئیں جو مارچ کے مقابلہ میں 11 فیصد اور گذشتہ سال اپریل کے مقابلہ میں 33 فیصد کم ہیں۔ مارچ میں 2036000 ٹن اور گذشتہ سال اپریل میں 2694000 ٹن پٹرولیم مصنوعات کی برآمدات ریکارڈ کی گئی تھیں۔ اعداد و شمار کے مطابق جاری مالی سال کے پہلے 10 ماہ میں ہائی سپیڈ ڈیزل کی درآمدات میں 40 فیصد، خام تیل 14 فیصد اور ایل این جی کی درآمدات میں سالانہ بنیادوں پر 13 فیصد کی کمی ریکارڈ کی گئی ہے۔
