اسلام آباد (این این آئی)الیکشن کمیشن کی جانب سے انتخابی قواعد میں ترمیم کا معاملہ،پیپلز پارٹی نے الیکشن کمیشن کو تحریری طور پر تحفظات سے آگاہ کر دیا اس ضمن میں نیئر حسین بخاری نے خط لکھ کر کہاہے کہ جمہوریت، شفافیت اور قانون پر یقین رکھنے والا پاکستانی اور پارٹی سکرٹری جنرل ہوں۔
انہوں نے کہاکہ الیکشن کمیشن کی جانب سے الیکشن ایکٹ 2017 میں ترامیم کا جائزہ لیا ہے، ترامیم پر الیکشن کمیشن کو اپنے تحفظات سے آگاہ کرنا چاہتا ہوں۔ انہوں نے کہاکہ اگلے عام انتخابات کو صاف اور شفاف انداز میں منعقد کرانے کے لئے کمیشن کوششیں قابل تعریف ہیں۔ نیئر حسین بخاری نے کہاکہ الیکشن کمیشن کی جانب سے مجوزہ گارم 68 میں ترامیم پر بہت سنجیدہ تحفظات اور اعتراضات ہیں۔
نیئر حسین بخاری نے کہاکہ اس شق کے تحت انتخابی امیدوار کو کیمپین فنانس رولز کے تحت اپنی پارٹی کے مکمل انتخابی اخراجات کی تفصیل فراہم کرنا ہوگی،الیکشن ایکٹ 2017 کے رول 161کے سب رول 3 کے تحت سیاسی جماعتوں کو انتخابی نتائج گزٹ نوٹیفیکیشن کے 60 دن میں جمع کرانا ہیںجبکہ فارم 68 کے تحت کیمپین فنانس سب سیکشن 211/2 کے مطابق کامیاب امیدوار کو پولنگ کے 10 روز کے اندر اپنی پارٹی کے انتخابی اخراجات کی تفصیل دینا ہوگی ۔
انہوں نے کہاکہ باقی تمام امیدواروں کو سیکشن 98 124 اور 136 کے مطابق انتخابی اخراجات کی تفصیل 30 دن میں جمع کرانا ہوں گی ۔ انہوںنے کہاکہ پارٹی امیدواروں کیلئے شرط اور دیگر امیدواروں کے شرائط میں تضاد ہے اور ایسا کرنا ناممکن ہے،امیدوار وہ اطلاعات کیسے فراہم کر سکتے ہیں جو انہیں خود بھی نا ملی ہوں۔ خط میں کہاگیاکہ اپ سے درخواست ہے کہ الیکشن قواعد میں تجویز کردہ ان شرائط کے کالم کو ختم کیا جائے۔
