لاہور( این این آئی)حکومت نے ایک بارپھر بجلی کی قیمتوں میں اضافہ کرنے کا فیصلہ کیا ہے ، کراچی کیلئے 5.65 روپے اور ملک بھر کیلئے 2.01 روپے مہنگی کرنے کی سفارش کردی گئی۔بجلی فراہم کرنے والی کمپنیوں نے نیپرا کو ماہانہ اور سہ ماہی ایڈجسٹمنٹ کی مد میں بجلی مہنگی کی سفارش کی ہے۔
رپورٹ کے مطابق کراچی کے بجلی صارفین سے 5 روپے 65 پیسے فی یونٹ اضافے وصولی جبکہ ملک بھر کے صارفین کیلئے بھی بجلی 2 روپے ایک پیسے فی یونٹ مہنگی ہونے کا امکان ہے۔رپورٹ کے مطابق کراچی کیلئے جنوری تا مارچ 5.17 روپے جبکہ اپریل کیلئے 418 پیسے فی یونٹ بجلی مہنگی کرنے کی سفارش کی گئی ہے،
اضافے سے کراچی کے صارفین پر 74 کروڑ 70 لاکھ روپے کا اضافی بوجھ پڑے گا۔ملک بھر کے بجلی صارفین کیلئے ماہانہ فیول ایڈجسٹمنٹ کی مد میں بجلی 2 روپے ایک پیسے فی یونٹ مہنگی ہونے کا امکان ہے، یہ اضافہ اپریل کی ماہانہ فیول ایڈجسٹمنٹ کے تحت مانگا گیا ہے۔کے الیکٹرک اور سی پی پی اے کی درخواستوں پر نیشنل الیکٹرک اینڈ پاور ریگولیٹری اتھارٹی (نیپرا ) 31 مئی کو سماعت کرے گا۔
