لاہور( این این آئی)لیزنگ کمپنیوں کے پی آئی اے کی مدد سے انکار کے بعد لیز پر لیے گئے طیارے گرائونڈ ہونے کا خدشہ پیدا ہو گیا ہے۔نجی ٹی وی کے مطابق قومی ایئرلائن اپنے تاریخ کے سنگین ترین مالی مشکلات کا شکار ہو گئی ہے اور غیر یقینی صورتحال کے باعث پی آئی اے کو ہونے والی ادائیگیاں بھی رک گئی ہیں جس کی وجہ سے وہ اپنی اشد ضروری ادائیگیوں سے بھی قاصر ہے۔
قومی ایئرلائن کے 4 عدد بوئنگ 777 اور 5 عدد ایئر بس 320 طیارے جو لیز پر حاصل کیے گئے تھے کا گرائونڈ ہونے کا خدشہ ہے، لیزنگ کمپنیوں نے ٹرپل سی کے حامل کریڈٹ ریٹنگ والے ملک کے اداروں کے ساتھ کام کرنے سے انکار کر دیا ہے۔بین الاقوامی ادائیگیوں میں 100 ملین ڈالر سے اوپر کی رقوم واجب الادا ہیں
جس میں جہازوں اور انجن کے لیز کے پیسے، انٹر نیشنل ہیڈلنگ اور ایئرپورٹ چارجز اور قرضوں پر سود کی ادائیگیاں شامل ہیں۔ایف بی آر کو بھی پی آئی اے نے 3 ارب روپے ادا کرنے ہیں، جہازوں کی مرمت کے حوالوں سے بوئنگ کا کمپونینٹ سپورٹ پروگرام اور ایئر بس انڈسٹریز کا سپورٹ پیکیج بھی متاثر ہو رہا ہے، جس کی وجہ سے آئے دن جہازوں کے خراب ہونے کے واقعات میں اضافے کا سامنا ہے۔
