اسلام آباد (این این آئی)ترجمان پی ڈی ایم حافظ حمد اللہ نے کہا ہے کہ عمران خان کے وکلاء کا ملاقات کے بعد اٹک جیل کے باہر بیان این آر او کی بھیک ہے، انکے بقول پی ٹی آئی چیرمین بات چیت کرنا چاہتے ہیں ۔ اپنے بیان میں حافظ حمد اللہ نے کہاکہ اس سے اب کلیئر ہوگیا کہ عمران خان این آر او چاہتا ہے اور اس کیلئے پیغامات دے رہا ہے۔
حافظ حمد اللہ نے کہاکہ اب سمجھ آگئی ہوگی کہ بشری بی بی کیوں دوست ملک کی اہم شخصیت سمیت مختلف لوگوں سے ڈیل کیلئے ملاقاتیں کرتی رہی اور کچھ روز پہلے نجی ٹی وی پر نمائندہ خصوصی برائے مشرق وسطی طاہر اشرفی نے بھی انکشاف کیا کہ عمران خان کے قریبی صاحب منصب شخصیت نے بھی دوست ممالک سے ڈیل کے لیے رابطے کیے ۔حافظ حمد اللہ نے کہاکہ یہ شخصیت یقینا صدر عارف علوی ہی ہوسکتے ہے جو اپنے منصب کا غلط استعمال کرکے عمران خان کو این آر او دینے کی کوششیں کررہا ہے ۔
