اسلام آباد (این این آئی)چیف آف آرمی اسٹاف جنرل سید عاصم منیر نے ملکی معیشت کی بحالی اور پاکستان کی ترقی و خوشحالی کیلئے پالیسیوں کے تسلسل میں نگران حکومت کے ساتھ پاک فوج کے بھرپور تعاون کی یقین دہانی کروائی ہے جبکہ وزیرِ اعظم نے ایس آئی ایف سی کے تحت سرمایہ کاری کیلئے تیار موزوں ماحول سے بھرپور فائدہ اٹھانے اور تعین شدہ منصوبوں کی تکمیل کی ہدایت کی ۔
نگران وزیرِ اعظم انوار الحق کاکڑ کی زیر صدارت خصوصی سرمایہ کاری سہولت کونسل کا چوتھا اجلاس پیر کو اسلام آباد میں منعقد ہوا ۔نگران وزیرِ اعظم کی صدارت اور عبوری حکومت میں SIFC کی ایپکس کمیٹی کا یہ پہلا اجلاس تھا اجلاس میں چیف آف آرمی اسٹاف، عبوری کابینہ، چاروں صوبوں کے وزرائے اعلی، صوبائی وزراء اور اعلی حکام نے شرکت کی۔
اجلاس میں کابینہ کو ایس آئی ایف سی کے قیام کے بعد اس قلیل مدت میں جاری منصوبوں اور مکمل شدہ اہداف پر تفصیلی بریفنگ دی گئی۔وزیرِ اعظم نے ایس آئی ایف سی کی اب تک کی بہترین کارکردگی اور ’’Whole of the Government اپروچ کے ذریعے مختلف محکموں اور اداروں کے مابین تعاون کو سراہا۔اپیکس کمیٹی نے ایس آئی ایف سی کے بین الاقوامی سطح پر تعاون کی کوششوں کو سراہا۔
کمیٹی نے برادرانہ ممالک کی طرف سے سرمایہ کاری بڑھانے کیلئے اعلی سطحی وفود جن میں سعودی عرب اور اسلامی تنظیم برائے غذائی تحفظ (IOFS) شامل ہیں کے دوروں کو بھی سراہا۔اپیکس کمیٹی نے ایس آئی ایف سی کے اقدامات کو سراہتے ہوئے ملکی معیشت کی بحالی کیلئے اپنے مکمل تعاون کی یقین دہانی کرائی۔
اپیکس کمیٹی نے زراعت/لائیو اسٹاک، کان کنی/معدنیات، آئی ٹی اور توانائی کے شعبوں میں سرمایہ کاری کے فروغ کیلئے گزشتہ حکومت کے منظور کردہ منصوبوں کی توثیق کی۔وزیرِ اعظم نے ایس آئی ایف سی کے تحت سرمایہ کاری کیلئے تیار موزوں ماحول سے بھرپور فائدہ اٹھانے اور تعین شدہ منصوبوں کی تکمیل کی ہدایت کی ۔چیف آف آرمی اسٹاف نے ملکی معیشت کی بحالی اور پاکستان کی ترقی و خوشحالی کیلئے پالیسیوں کے تسلسل میں نگران حکومت کے ساتھ پاک فوج کے بھرپور تعاون کی یقین دہانی کروائی۔
